काठमाडौं । कीर्गिस्तानमा जारी नादेज्दा कप महिला फुटबलमा नेपालले आफ्नो दोस्रो खेलमा आज उज्वेकिस्तानको सामाना गर्दैछ ।

पहिलो खेलमा किर्गिस्तान विरुद्ध ८-२ को फराकिलो जित निकालेको नेपालले प्रतियोगिताको दोस्रो खेलमा आज उज्वेकिस्तानको सामाना गर्न लागेको हो ।

आयोजक किर्गिस्थानसँगको जितले नेपाली महिला राष्ट्रिय टोलीको आत्मविश्वास आजको खेलमा झल्किने निश्चित छ ।

यस अघि काराकोलस्थित सेन्ट्रल स्टेडियममा हिजो भएको खेलमा आयोजक कीर्गिस्तानलाई आठ दुई गोल अन्तरले पराजित गर्दै नेपालले विजयी सुरुवात गरेको थियो ।

नेपालको जीतमा सावीत्रा भण्डारीले ४, अनिता बस्नेतले-२ कप्तान निरु थापा र दिपा राईले समान १-१ गोल गरे । पहिलो हाफमा ६-२ गोलको अग्रता बनाएको नेपालले दोस्रो हाफमा थप दुई गोल गर्दै सान्दार जित निकालेको हो ।

जितसँगै नेपालले तीन अंकबाट प्रतियोगिताको सुरुवात गरेको छ । राउण्ड रोबिनको आधारमा जारी लिगको शीर्ष दुई टोलीले उपाधिका लागि खेल्नेछन् ।

प्रतियोगितालाई नेपाली महिला टोलीको साग तयारीको रुपमा हेरिएको छ ।