अख्तियार दुरुपयोग अनुसन्धान आयोगले नक्कली शैक्षिक प्रमाणपत्र पेश गरी शिक्षकको जागिर खाएकोे अभियोगमा बाँकेका एक शिक्षकमाथि मुद्दा चलाएको छ ।

बाँकेको डुडुवा गाउँपालिका पदमपुरस्थित शहीद स्मारक माध्यामिक विद्यालयका प्रा.वि. द्वितीय श्रेणीका शिक्षक उदयराज यादवमाथि अख्तियारले मंगलबार विशेष अदालत काठमाडौंमा मुद्दा दायर गरेको हो ।

यादवले भारतको माध्यमिक शिक्षा परिषद् उत्तर प्रदेश बोर्ड अफ हाइस्कुल एण्ड इन्टरमिडिएट एजुकेशनबाट हाइस्कुल उत्तीर्ण गरेको झुठ्ठा शैक्षिक योग्यताको प्रमाणपत्र पेश गरेको अख्तियारको अभियोग पत्रमा उल्लेख छ ।

उनले २८ कार्तिक २०४१ देखि २९ पुस २०७६ सम्म शिक्षकको रुपमा काम गरेका थिए । २९ पुसमा ६० वर्ष पुगेपछि अवकाश पाएइसकेका छन् । अख्तियारको छानबिन जारी रहेकाले उनलाई पेन्सन लगायतका कागजात बनाउन रोक लगाइएको थियो ।