७६ काठमाडौं, १फागुन:भारतको भिस्तारा एअरलाइन्सले आजदेखि काठमाडौं–दिल्ली उडान शुरू गरेको छ ।
भारतको टाटा समूह र सिंगापुर एअरलाइन्सको जोइन्ट भेन्चरमा सञ्चालनमा आएको भिस्ताराले भारत बाहिरको पाँचौ गन्तव्यका रूपमा काठमाडौं उडान शुरू गरेको हो । दैनिक एक उडान शुरू गरेको एअरलाइन्सले काठमाडौं–दिल्लीको दुईतर्फी भाडा १५ हजार ८०० रूपैयाँ तोकेको छ । यस्तै बिजनेश क्लासको भाडा भने ६१ हजार रूपैयाँ तोकिएको जानकारी कम्पनीले दिएको छ ।

भिस्तारका प्रमुख व्यापारिक अधिकृत बिनोद कन्नले दिल्लीदेखि काठमाडौंसम्मको उडान शुरू हुँदा कम्पनीमा उत्साह थपेको बताए । उनले भने, “यस उडानबाट यात्रुहरूलाई विश्वस्तरीय सेवा प्रदान गर्ने प्रयास गर्ने छौं ।” भिस्तारामा तीन श्रेणीको सिटको व्यवस्था रहे पनि नेपाल र दिल्लीको यात्रामा भने प्रिमियम र इकोनिम वर्गको गरी दुई श्रेणीको सिट सुविधा मात्र छ । एअर बस र बोइङ विमानबाट सेवा दिँदै आएको कम्पनीले सबै ठाउँमा गरी दैनिक २०० उडान गर्दै आएको छ ।
भिस्तारामा टाटाको ५१ र सिंगापुर एअरलाइन्सको ४९ प्रतिशत शेयर छ । कम्पनीले आफ्नो पहिलो उडानका रूपमा सन् २०१५ मा दिल्ली(मुम्बई उडान शुरू गरेको थियो ।