२८ असार, एजेन्सी-  अमेरिकाको मिसिसिपी राज्यमा सोमबार भएको एक सैनिक विमान दुर्घटनामा १६ सैनिकको मृत्यु भएको छ । मध्यमिसिसिपीको लेफोरे प्रान्तमा स्थानीय समयाअनुसार सोमबार अपराह्न ४ बजे सेनाको सानो विमान दुर्घटनाग्रस्त भएको हो । दुर्घटनाग्रस्त विमान सेनाको कार्गाे विमान रहेको बताइएको छ ।

विमान दुर्घटनाका बारेमा अनुसन्धान भइरहेको मिसिसिपीका सैनिक प्रवक्ता क्याप्टेन सराह बर्नसले बताए । मिसिसिपीको डेल्टाबाट १३५ किलोमिटर पश्चिममा रहेको लेफोरेमा सो विमान दुर्घटनामा परेको प्रान्तीय संकटकालीन निकायका निर्देशक फ्रान्स रान्डले बताए । दुर्घटनास्थलमा ठूलो संख्यामा सैनिक परिचालन गरिएको छ । विमान दुर्घटनाको कारण खुलेको छैन ।

आइएसलाई सहयोग गर्ने सैनिक पक्राउ
अतिवादी मुस्लिम समूह आइएसलाई सहयोग गरेको आरोपमा एक अमेरिकी सैनिक पक्राउ परेका छन् । अमेरिकी सेनामा कार्यरत ३४ वर्षीय एरिक काङ पक्राउ परेको अमेरिकी अनुसन्धान निकाय एफबिआईले जनाएको छ । हवाईको राजधानी सहर होनोलुलूमा रहेकोे निवासबाट उनी पक्राउ परेका हुन् । काङले आइएसलाई आवश्यक सैनिक सामग्री उपलब्ध गरेको र तालिमसमेत दिने गरेको प्रमाण भेटिएको सेनाले दाबी गरेको छ ।

पक्राउ हुनुअघि काङ हवाईमा रहेको सैनिक उड्डयनसम्बन्धी सेवामा ट्राफिक नियन्त्रण कार्यालयमा काममा खटिएका थिए । कार्यालय समयमा उनले बारम्बार आइएसलाई सहयोग गरेको प्रहरीले दाबी गरेको छ । उनी सन् २०१० मा इराकमा र सन् २०१४ मा अफगानिस्तानमा आइएसविरुद्धको युद्धमा खटिएका थिए । उनीमाथि केही महिनायता प्रहरीले निगरानी बढाएको थियो ।