चालु आर्थिक वर्षको सुरुदेखि नै एग्रेसिभ रूपमा कर्जा विस्तारमा लागेका बैंकहरूले चाडपर्व नजिक आउँदा पनि कर्जा विस्तारको रफ्तार झनै बढेको छ । वाणिज्य बैंकहरूले पछिल्लो एक सातमा मात्रै ३९ अर्बले कर्जा विस्तार गरेको नेपाल बैंकर्स संघको तथ्याङ्कले देखाउँछ ।

चाडपर्व लक्षित आयातलाई फाइनान्स भइसकेको हुँदा असोजपछि कर्जा विस्तारको गति घट्ने अपेक्षा विपरीत पछिल्लो साता झनै चालु आर्थिक वर्ष लागेपछिकै उच्च कर्जा विस्तार भएको छ । तर, पछिल्लो साता कर्जासँगै निक्षेपमा पनि वृद्धि हुँदा बैंकहरूलाई केही सहजता भने भएको बैंकरहरू बताउँछन् ।

पछिल्लो साता ३९ अर्बले कर्जा विस्तार हुँदा निक्षेप पनि ३८ अर्बले बढेको छ । असोज ८ गते ३९ खर्ब ३ अर्ब रहेको वाणिज्य बैंकहरूको कर्जा लगानी असोज १५ गते शुक्रबार ३९ अर्बले बढेर ३९ खर्ब ४२ अर्ब पुगेको हो । यस्तै, असोज ८ मा ४१ खर्ब ८० अर्ब रहेको बैंकहरूको निक्षेप एक साता ३८ अर्बले बढेर असोज १५ गते शुक्रबार ४२ खर्ब १८ अर्ब पुगेको छ ।

चाडपर्वलाई लक्षित गर्दै तलब भत्ताका साथै अन्य बजेट निकासा हुँदा केही निक्षेप बढेपनि कर्जा विस्तार उच्च हुँदा बैंकिङ प्रणालीमा सकारात्मक संकेत भने देखिँदैन । तर, पछिल्लो १५ दिनमा बढेको कर्जाले बैंकिङ प्रणालीमा यही अवस्थामा कर्जा विस्तार हुने हो भने कार्तिबाट निक्षेपको ब्याजदर झनै बढ्ने देखिन्छ ।

असोज महिनाको १५ दिनमा मात्रै २७ वाणिज्य बैंकहरूले ७० अर्बले कर्जा विस्तार गरेका छन् । जबकि अघिल्लो दुई महिनामा १ खर्ब ५० अर्बले बढेको कर्जाको ५० प्रतिशत पछिल्लो १५ दिनमा नै बढेको हो । २०७८ असार मसान्तमा ३७ खर्ब २१ अर्ब रहेको वाणिज्य बैंकहरूको कर्जा लगानी साउन ८ मा ३७ खर्ब ६ अर्बमा झरेपछि त्यसपछि भदौ मसान्तमा आउँदा ३८ खर्ब ७२ अर्ब पुगेको थियो । तर। पछिल्लो १५४ दिनमा भने ३८ खर्ब ७२ अर्बबाट बढेर ३९ खर्ब ४२ अर्ब पुगेको छ । चालु आर्थिक वर्ष लागेपछि वाणिज्य बैंकहरूकले मात्रै २ खर्ब ७८ अर्बले कर्जा विस्तार गरेका छन् ।

जबकि यही अवधिमा वाणिज्य बैंकहरूको कुल निक्षेप भने १७ अर्बले मात्रै बढेको छ । असार मसान्तमा ४१ खर्ब १ अर्ब रहेको निक्षेप भदौ ४ गते ४१ खर्ब १७ अर्बसम्म झरेको थियो । त्यसपछि बढ्न थालेको निक्षेप भदौ मसान्तमा बढेर ४१ खर्ब ७१ अर्ब पुगेको हो । भदौ लागेपछिको १५ गतेसम्म भने निक्षेप ४७ अर्बले बढेर ४२ खर्ब १८ अर्ब पुगेको छ ।

भदौ १८ गतेपछि बैंकहरूले विदेशी मुद्राको निक्षेप एक बैंकबाट अर्को बैंकमा राखेर कृत्रिम निक्षेप सिर्जना गरेकोमा गत साता राष्ट्र बैंकले बैंकहरूलाई त्यस्तो कार्य नगर्न निर्देशन दिएपछि यो साता भने ४ अर्बले घटेको छ । भदौ १८ मा १ खर्ब२० अर्ब रहेको विदेशी मुद्राको निक्षेप असोज ८ मा १ खर्ब १८ अर्बसम्म पुगेको थियो । तर, राष्ट्र बैंकको निर्देशनपछि पछिल्लो साता भने विदेशी मुद्राको निक्षेप ४ अर्बले घटेर १ खर्ब ५४ अर्बमा झरेको छ ।