निरंजन साह,जनकपुरधाम । प्रदेश नम्बर दुई को अस्थायी राजधानी जनकपुरमा विद्युत प्राधिकरण जनकपुर शाखाको क्यु म्यानेजमेण्ट सिस्टम प्रयोग विहीन भएको छ ।

जनकपुर वितरण केन्द्रमा विद्युत महशुल तिर्न आउने ग्राहकहरुलाई अनुशासित र मर्यादित बनाउन साथै भीडलाई नियन्त्रण बनाइएको सिस्टम प्रयोग विहीन भएका छन ।

विद्युत लाइन पनि छ, मेसिन पनि छ तर मुख्य स्लीप (टोकन) लिने काउण्टर नै बन्द भएकाले यो विधि प्रयोग गर्नबाट बञ्चित भएको विद्युत महशुल बुझाउनेले गुनासो गरेको हो ।

जनकपुर क्याम्पस चोकमा अवस्थित वितरण केन्द्रमा अहिले महिला र अपांगको लागि छुट्टै विल बुझाउने काउण्टर भए पनि कार्यालय प्रमुखको लापरवाहीले अपांगहरुले प्रयोग गर्ने काउण्टरमा सपांगहरु प्रयोग गरेको दृश्य सहजै देख्न सकिन्छ ।

महिलाको काउन्टरमा पुरुष र पुरुषको काउण्टरमा महिला बिजुली बिल बुझाउने भएपछि क्यु सिस्टम नै भताभुंग भएको हो।
बिजुली महशुल बुझाउन अहिले जनकपुर वितरण केन्द्रमा जम्मा आठ काउण्टर रहेका छन् ।