काठमाडौं । पूर्व प्रधानमन्त्री, शेर बहादुर देउवा, केपी ओली, र माधव नेपालले नेपाली क्रिकेट टोली विश्वकप क्रिकेट छनोटमा पुगेको खुसी व्यक्तगर्दै बधाई दिएका छन्।

यूएईलाई ९ रनले हराउँदै नेपालले, विश्वकप छनोट यात्रा तय गरेपछि पूर्वप्रधानमन्त्री शेरबहादुर देउवाले बधाई दिएका छन्। उनले सामाजिक संजाल फेसबुकमा लेखेका छन्। ‘बधाई टिम नेपाल! आईसीसी क्रिकेट विश्वकप लिग टूको अन्तिम खेलमा यूएईलाई हराउँदै नेपाल एकदिवसीय विश्वकप छनोटमा पुगेकोमा हार्दिक बधाई ।’

त्यसैगरी नेकपा एमालेका अध्यक्ष केपी शर्मा ओलीले पनि नेपाली टोलीलाई बधाई दिएका छन्।
उनले लेखेका छन् ‘यूएईविरुद्धको खेलमा ऐतिहासिक जित निकालेर विश्वकप छनोटमा स्थान पक्का गरेकोमा नेपाली क्रिकेट टिमलाई हार्दिक बधाई। हामी गौरवान्वित छौँ, नेपाल गौरवान्वित छ।’

त्यस्तै पूर्व प्रधानमन्त्री एवं नेकपा एकिकृत समाजवादीका अध्यक्ष माधव कुमार नेपालले पनि नेपाली टोलीलाई बधाई दिएका छन् ।

सामाजिक संजाल फेसबुकमा उनले लेखेका छन् ‘आईसीसी क्रिकेट विश्वकप लिग–२ अन्तर्गत भएको एकदिवसीयमा युएईलाई हराउँदै विश्वकप क्वालिफायरमा छनोट भई नेपाली क्रिकेट इतिहासमै ठुलो उपलब्धि हासिल गर्न सफल नेपाली राष्ट्रिय क्रिकेट टोलीलाई हार्दिक बधाई ज्ञापन गर्दै थप सफलताको शुभकामना व्यक्त गर्दछु ।’

 

नेपाल आज डिएल मेथडमा युएईलाई पराजित गर्दै विश्वकप छनोटमा पुगेको छ ।