काठमाडौं । महालेखा परिक्षकको कार्यालयले आर्थिक वर्ष ०७८–७९ को लेखा परिक्षण प्रतिवेदन सार्वजनिक गर्दैछ । बबर महलस्थित महालेखा परिक्षणको कार्यालयमा कार्यालयले ६० औं प्रतिवेदन सार्वजनिक गर्न लागेको हो ।

कार्यालयले बिहीवार नै राष्ट्रपति रामचन्द्र पौडेललाई प्रतिवेदन बुझाई सकेको छ । प्रतिवेदनअनुसार आव ०७८–७९ को कुल बेरुजु १ खर्ब १९ अर्ब ७७ करोड रुपैयाँ रहेको छ । यो परिमाण संघ, प्रदेश र स्थानीय सरकारको एक मुष्ट हो । महालेखा परिक्षक कार्यालयका प्रवक्ता रबिन्द्रप्रसाद देवकोटाले आव ०७८–७९ को लेखा परिक्षण प्रतिवेदन सार्वजनिक गर्न लागिएको बताए ।

उनले भने,‘परिक्षकको कार्यालयले आव ०७८–७९ को लेखा परिक्षण प्रतिवेदन तयार गरेको छ । प्रतिवेदन आजै राष्ट्रिपति समक्ष पेश भएको छ । सोही प्रतिवदेन अहिले सार्वजनिक गर्न लागिएको हो । हामी त्यसैको तयारीमा छौं ।’

कार्यालयका अनुसार संघीय सरकारी कार्यालयको बेरूजु ५६ अर्ब ३१ करोड, प्रदेशमा ७ अर्ब २० करोड र स्थानीय तहमा ४२ अर्ब ८८ करोड र समिति तथा अन्य संस्थाको ११ अर्ब ९७ करोड बेरुजु रहेको छ ।

कार्यालयले यस वर्ष ६ हजार ५४६ सरकारी निकायको ७१ खर्ब ३८ अर्ब १६ करोड रुपैयाँ बराबरको लेखापरीक्षण गरिएको थियो । यस वर्ष बेरुजु प्रतिशत १।६८ प्रतिशत देखिएको छ । अब कुल बेरुजु रकम ५ अर्ब ८७ अर्ब ३३ करोड पुगेको छ ।