काठमाडौं । निर्वाचन आयोगले वैशाख १० गते हुने उपनिर्वाचनलाई सहज, स्वच्छ, निष्पक्ष र भयमुक्त बनाउन निर्देशन दिएको छ ।

आयोगले शनिबार विज्ञप्ति जारी गर्दै बारा–२, चितवन–२ र तनहुँ–१ मा आइतबार हुने उपनिर्वाचनलाई प्रचलित कानून र आचारसंहिताबमोजिम सम्पन्न गर्न सम्बद्ध राजनीतिक दल, उम्मेदवार, उम्मेदवारका प्रतिनिधिहरुलाई आग्रह गरेको हो ।

आयोगले मतदाताहरूलाई मतदानका लागि सहज र सुरक्षित वातावरण बनाई मतदान केन्द्रमा मतदान गर्न जाँदा प्रज्ज्वलनशील ठोस वा तरल पदार्थ, मोबाइल, क्यामरा वा यस्तै प्रकृतिका सामानहरू साथमा लिएर जान निषेष्ध गरेको छ ।

यस्तै आयोगले कुनै नशालु पदार्थ वा मादक पदार्थ सेवन गरी मतदान केन्द्रमा प्रवेश गर्न निषेध गर्ने, निर्वाचन आचारसंहिता, २०७९ बमोजिम मतदान कार्यमा खटिने कर्मचारी र उम्मेदवारको प्रतिनिधिलाई तोकिए अनुसारका अनुसूची बमोजिमको प्रतिबद्धतापत्रमा दस्तखत गराइ सोको पूर्ण पालना गर्ने÷गराउने निर्देशन पनि दिएको छ ।

अशक्त ज्येष्ठ नागरिक, अपाङ्गता भएका व्यक्ति, सुत्केरी वा गर्भवती वा आफ्नो काखे बच्चा साथमा भएकी महिला, किरियापुत्री आदि जस्ता मतदातालाई मतदान गर्ने कार्यमा प्राथमिकता दिई सहजरुपमा मतदान गर्ने व्यवस्था मिलाउने लगायतका निर्देशनहरु पनि आयोगले दिएको छ ।