काठमाडौं । नेकपा एमालेका कार्यवाहक अध्यक्ष ईश्वर पोखरेलले देशलाई समृद्ध र नागरिकलाई सुखी बनाउन पुष्पलाल श्रेष्ठले मार्गनिर्देश गरेको बाटोमा अघि बढ्न आवश्यक भएको बताएका छन् ।

नेपाल कम्युनिष्ट पार्टीका संस्थापक महासचिव पुष्पलालको ४५औं ‘स्मृति दिवस’ को उपलक्ष्यमा एक विज्ञप्ति जारी गर्दै पोखरेलले पुष्पलाल बाम–लोकतान्त्रिक आन्दोलनको सहकार्यको सुत्रधार भएको उल्लेख गरेका छन् ।
उनले पुष्पलालको अगुवाईमा नेपाली समाजको तत्कालीन अवस्थाको गहिरो विश्लेषणका साथ नेपाली समाज र राजनीतिलाई मार्गनिर्देशन गर्ने विचारद्वारा निर्देशित संगठन नेपाल कम्युनिष्ट पार्टीको स्थापना भएको बताए ।

कार्यवाहक अध्यक्ष पोखरेलद्वारा जारी विज्ञप्तिमा भनिएको छ ‘ यो नेपालको वाम–लोकतान्त्रिक आन्दोलनमा पुष्पलालको साँच्चीकै श्रेष्ठ योगदान हो । देशलाई समृद्ध र बलियो बनाउने साधन सही विचार बोकेको राजनीतिक पार्टी हो । ’

उनले पार्टीलाई बलियो बनाउँदै देशलाई समृद्ध र नागरिकलाई सुखी बनाउन पुष्पलालले मार्गनिर्देश गरेको बाटोमा अघि बढ्नु आवश्यक भएको बताए ।
नेकपा एमालेको सरकारले थालनी गरेका दूरगामी महत्वका काम जनताको साझा राष्ट्रिय उपलब्धिका रुपमा रहेको पनि विज्ञप्तिमा उल्लेख गरिएको छ ।

नेकपा ९एमाले० देशभक्तिपूर्ण, लोकतान्त्रिक, परिवर्तनकारी, विकासमुखी र नेपालको सर्वोपरी राष्ट्रिय आकांक्षालाई प्रतिनिधित्व गर्दै जनताबीच सक्रिय रहेको दल भएको पनि विज्ञप्तिमा उल्लेख गरिएको छ ।

एमालेले लोकतन्त्रलाई राजनीतिक अधिकारको संकुचित परिभाषाबाट माथि उठाउँदै जनताका सम्पूर्ण आवश्यकता परिपूर्तिको जीवनमूल्य समेटिएको ‘परिपूर्ण लोकतन्त्र’ का रुपमा अघि सारेको पनि कार्यवाहक अध्यक्ष पाखेरेलले बताएका छन् ।