३ जेठ, काठमाडौँ- नेपाल प्रहरीको केन्द्रीय अनुसन्धान ब्युरोले भारतबाट नेपालको विभिन्न नाका हुँदै अवैध तरिकाले प्रतिबन्धित भारतीय नोट ल्याएका १५ जनालाई पक्राउ गरेको छ ।

ब्युरोबाट खटिएको टोलीले तिलगंगास्थित शम्भु मार्गमा रोकिराखेका दुई गाडीबाट भारतमा प्रतिबन्ध लगाइएको ५०० र एक हजार दरका २ करोड ३५ लाख ६१ हजार भारतीय रुपैयाँ बरामद गरेको हो ।

विशेष सूचनाका आधारमा ब्युरोले काठमाडौं महानगरपालिका-८ विनायक नगरस्थित कमला भण्डारीको डेराबाट पनि ९८ लाख भारतीय रुपैयाँ बरामद गरेको छ । पक्राउ परेका सबैलाई आजै बरामद नगदसहित प्रहरीले सार्वजनिक गरेको छ ।

पक्राउ पर्नेमा कमला भण्डारी, दिलीपकुमार लाल, मेघबहादुर थापा, सानुराजा रञ्जित, राजकुमार गिरी, अङ्कुर अग्रवाल, दिनेश अग्रवाल, अनिलकुमार पन्साली, सुरेन्द्रकुमार साङ्घाई, सञ्जयकुमार चौधरी, नवराज गुरुङ, पृथ्वी शाह, अमी रुद्दीन, मजेन लामा र पूर्णबासी गुप्ता रहेका छन् ।

उनीहरुले झोलामा लुकाएर सेन्ट्रो कारमा ल्याउँदै गर्दा प्रहरीले फेला पारेको हो । पक्राउ परेकालाई आवश्यक कारबाहीका लागि राजस्व अनुसन्धान विभाग हरिहरभवन पठाएको प्रहरीले जनाएको छ ।