एजेन्सी, रोम- इटालियन ओपनमा अस्ट्रेलियन खेलाडी डोमिनिकले पूर्व एक नम्बर खेलाडी राफेल नाडालको अपराजित १६औँ खेलमाथि
पूर्णविराम लगाए

स्पेनिस नम्बर एक खेलाडी राफेल नाडालको लगातार १६ खेलको अपराजित यात्रा समाप्त भएको छ । इटालियन ओपनअन्तर्गत क्वार्टरफाइनलमा नाडाल अस्ट्रेलियन खेलाडी डोमिनिक थिएमबाट ६–४ र ६–३ को सीधा सेटमा स्तब्ध भएका हुन् । यसअघि नाडालले लगातार क्ले कोर्टमा तीन उपाधि जितेका छन् । नाडालले बार्सिलोना तथा म्याड्रिड ओपनमा डोमिनिकलाई पाखा लगाएका थिए ।

म्याड्रिड ओपनको बदला पूरा
दुई साताअघि म्याड्रिड ओपनको फाइनलमा नाडाल र डोमिनिकबीच प्रतिस्पर्धा भएको थियो । अस्ट्रेलियन डोमिनिकले फाइनलमा नाडाललाई चुनौती दिएका थिए । तर क्ले कोर्टकै दिग्गज खेलाडी नाडालले आफ्नो अनुभव प्रयोग गर्दै डोमिनिकलाई ७–६ र ६–४ ले पाखा लगाउँदै सिजनकै तेस्रो उपाधि हात पारेका थिए । इटालियन ओपनमा नाडाल डोमिनिकभन्दा कमजोर देखिए । ३० वर्षीय नाडालमाथि डोमिनिकले एकपछि अर्को उत्कृष्ट सट प्रहार गर्दै दबाबमा राखे । डोमिनिकले म्याड्रिड ओपनमा व्यहोरेको हारको बदला पूरा भएको बताएका छन् । ‘म्याड्रिड ओपनमा सामना गरेको हारको बदला पूरा भएको छ,’ डोमिनिकले भने, ‘प्रतिस्पर्धामा मैले नाडालको कमजोरीको फाइदा उठाएँ ।’