१० असार, लन्डन-  इंग्लिस प्रिमियर क्लब आर्सनलले इतिहासमै पहिलो प्रमुख खेलाडीको प्रतिसाता पारिश्रमिक बढाउने तयारी गरेको छ । आर्सनलले आफ्नो योजना पूरा गरे इंग्लिस प्रिमियरसिप लिगमा ठूलो हलचल हुनेछ । आर्सनलले चिल्लि स्ट्राइकर एलेक्सिस सान्चेज र जर्मन मिडफिल्डर मेसुत ओसिलका प्रतिसाता पारिश्रमिक लगभग दोब्बर पार्न लागेको ब्रिटिस मिडियाहरूले जनाएका छन् ।

प्रतिवर्ष ७० लाख पाउन्ड वृद्धि
प्रिमियर लिगकै ठूला क्लब मान्यता पाए पनि आर्सनलले कहिल्यै खेलाडी भिœयाउन र पारिश्रमिक बढाउन खासै खर्च गरेको देखिँदैन । आर्सनलले अक्सर औसत खेलाडी मात्र भिœयाउने गर्छ । अति नै आवश्यक पर्दा मात्र आर्सनलले ठूलो रकम खर्चन तयार हुन्छ । यसबाहेक आर्सनलले ठूला क्लबबाट कीर्तिमानी रकममा खेलाडी भिœयाएको खासै इतिहास भेटिन्नँ । तर, आर्सनलले प्रत्येक वर्ष खेलाडीको पारिश्रमिक बढाउने गरेको छ । आर्सनलले हरेक वर्षजसो खेलाडीलाई ७० लाख पाउन्ड थप गर्छ ।

नयाँ सम्झौताको तयारी
आर्सनलले सान्चेज र ओजिलसँग नयाँ सम्झौता गर्ने तयारी गरेको छ । सो सम्झौताअनुसार दुवै खेलाडीका प्रतिसाता २ लाख ८० हजार पाउन्ड हुने छन् । पुरानो सम्झौताअनुसार सान्चेजले १ लाख ३० हजार तथा ओजिलले १ लाख ४० हजार पाउन्ड प्रतिसाता बुझ्थे । नयाँ सम्झौता हुँदा सान्चेज र ओजिलले आर्सनलबाट प्रतिवर्ष १५ करोड पाउन्ड लिने छन् ।
आर्सनल समस्यामा पर्न सक्छ

यसपटक आर्सनल युरोपियन च्याम्पियन्स लिगमा छनोट हुन सकेन । आर्सनल केवल एफए कप र युरोपा लिगमा मात्र सीमित भएको छ । यी दुई प्रतियोगिताबाट आर्सनलको खासै आर्थिक वृद्धि नहुने विश्लेषकहरूको भनाइ छ । च्याम्पियन्स लिग खेल्दा मात्र क्लबहरूको आर्थिकस्तर बढ्ने उनीहरूको तर्क छ । यस अवस्थामा आर्सनलले दुई स्टार खेलाडीलाई दोब्बर पारिश्रमिक दिँदा आर्थिक संकट आउन सक्ने सम्भावना छ । दुई खेलाडीको पारिश्रमिक बढ्दा अन्य खेलाडीको पनि त्यही अनुपातमा बढाइनुपर्ने विश्लेषकहरूले प्रतिक्रिया दिएका छन् । यही अवस्थामा आर्सनलले आफ्ना खेलाडीको तलब वृद्धि गर्दा नयाँ सिजनमा आर्थिक संकट पर्न सक्ने धारणा उनीहरूले राखेका हुन् ।

खेलाडी बिक्रीमा
आर्सनलले आर्थिक संकट मोचन गर्न युवा खेलाडीलाई बेच्ने तयारी पनि योजना अगाडि ल्याएको छ । ब्रिटिस मिडियाका अनुसार नयाँ खेलाडी किनबेच सिजनमा एलेक्स ओक्सडे र ओलिभर गिरुडजस्ता प्रतिभाशाली खेलाडीलाई मोटो रकममा अन्य क्लबमा पठाउन लागेको एजेन्सीहरूले जनाएका छन् । एलेक्सलाई लिभरपुल, चेल्सी र म्यानचेस्टर सिटीले भित्रयाउने चलखेल गरेका छन् । एलेक्सको प्रारम्भिक भाउ २ करोड ५० लाख पाउन्ड तोकेको छ । गिरुडको भने स्थानान्तर रकम राखेको छैन ।

साभरः नया पत्रिका