भक्तपुर । भक्तपुरको मध्यपुर थिमी नगरपालिकामा भएका दुई सवारी दुर्घटनामा तीनजनाको ज्यान गएको छ।

महानगरीय प्रहरी परिसर भक्तपुरका प्रवक्ता प्रहरी नायब उपरीक्षक रेवतीरमण पोखरेलले सोमबार बिहान मध्यपुर थिमी नपा ३ नमुना बस्तीमा पानी ट्यांकरले ठक्कर दिँदा तेर्‍हथुमको आठराई गाउँपालिका ७ घर भई हाल सोही ठाउँमा बस्दै आएका ७८ वर्षीय नेत्रप्रसाद पराजुलीको ज्यान गएको जानकारी दिए।

उनका अनुसार बा ४ क ४२१४ नम्बरको पानी ट्यांकरको ठक्करले घाइते भएका पराजुलीलाई उपचारको लागि मध्यपुर थिमीको गठ्ठाघरस्थित नागरिक सामुदायिक अस्पताल पुर्‍याइएको थियो। उपचारकै क्रममा उनको मृत्यु भएको प्रहरी नायब उपरीक्षक पोखरेलले बताए।

उनका अनुसार पानी ट्यांकरका चालक फरार छन्। पानी ट्यांकर भने महानगरीय प्रहरी वृत्त ठिमीको नियन्त्रणमा राखिएको छ। घटनाबारे थप अनुसन्धानसँगै फरार चालकको खोजतलास भइरहेको परिसरले जनाएको छ।

त्यस्तै गए राती रोकिराखेको मिनिट्रकलाई पछाडिबाट आएको गाडीले ठक्कर दिँदा अगाडि रहेको टिपरमा ठोकिन पुग्दा दुईजनाको मृत्यु भएको छ।

भक्तपुर परिसरका अनुसार मध्यपुर थिमी नपा ४ क्षयरोग अस्पताल नजिकै काठमाडौंबाट भक्तपुर जाने सडक खण्डमा रोकिराखेको बा २ ख १६५४ नम्बर आइचर मिनिट्रकलाई सोही दिशाबाट आउँदै गरेको बा ५ ख ३७६५ नम्बरको काभ्रे काठमाडौं नगर बसले पछाडिबाट ठक्कर दिएको थियो।

बसको ठक्करले मिनिट्रक उछिटिएर अगाडि रोकिराखेको बा २ क ३९३५ नम्बरको ट्रिपर पछाडि ठोकिन जाँदा मिनिट्रक चालक र सहचालक घाइते भएका थिए।

घाइते चालक काभ्रे बनेपा नगरपालिका ४ नाला बस्ने ३४ वर्षीय राजेन्द्र श्रेष्ठ र सहचालक २८ वर्षीय टार्जन श्रेष्ठलाई उद्धार गरी उपचारको लागि त्रिवि शिक्षण अस्पताल काठमाडौं पठाइएको प्रहरी नायब उपरीक्षक पोखरेलले जानकारी दिए।

उनका अनुसार उपचारकै क्रममा गएराती दुवैको शिक्षण अस्पतालमा मृत्यु भएको थियो। घटनामा संलग्न तीनवटै सवारीसाधन र बस तथा ट्रिपर चालक महानगरीय प्रहरी वृत्त ठिमीको नियन्त्रणमा रहेका छन्। घटनाबारे थप अनुसन्धान कार्य भइरहेको भक्तपुर परिसरले जनाएको छ।