मुख्य खबर

मालपोत कार्यालयका लेखापालको बैंक खातामा भेटियो  तीन करोड

  • Avatar
    Aarthik

    २०७७ असार १६ गते, मंगलवार ०८:११ मा प्रकाशित

काठमाडौं –मालपोत कार्यालय बारामा कार्यरत एक लेखपालको बैँक खातामा करिब ३ करोड रुपियाँ मौजाद रहेकाे पाइएपछि अख्तियारको फन्दामा परेका छन् । गैरकानूनीरुपमा सम्पत्ति आर्जन गरेको अभियोगमा लेखापाल युगलकिशोर ठाकुरविरुद्ध विशेष अदालतमा आज सोमबार मद्दा दायर गर्ने क्रममा उनको नाममा राष्ट्रिय बाणिज्य बैंक सिमरा शाखाको खातामा २ करोड ७६ लाख ४४ हजार रुपियाँ मौज्दात रहेको तथ्य सार्वजनिक भएको हो ।

त्यसबाहेक उनकाे नाममा विभिन्न बैंक तथा वित्तीय संस्थाहरुमा ११ लाख ३९ हजार पन्ध् रूपियाँ माैजाद रहेकाे पाइएकाे छ । यसअघि लकडाउन सुरू भएकाे दिनमा उनको घरकोठाबाट २४ लाख ९२ हजार रूपियाँ नगद बरामद गरिएकाे थियाे ।

अख्तियार दुरुपयोग अनुसन्धान आयोगका अनुसार २०६८ माघ ९ गते कोष तथा लेखा नियन्त्रक कार्यालय बाराबाट रापअन द्वितीय श्रेणीमा प्रवेश गरेका ठाकुर सहलेखापाल पदमा नियुक्ति भई २०७२ साल वैशाख २२ मा लेखापालमा बढुवा हुँदासम्म ३ करोड ४ लाख ९४ हजार ३ सय आठ रुपियाँ बराबरको सम्पत्ति गैरकानूनीरुपमा आर्जन गरेको पाइएको हाे ।

ठाकुरले सार्वजनिक सेवाको पदमा रहँदा ३ करोड १५ लाख ७५ हजार १६ रुपियाँ बराबरको सम्पत्ति सिर्जनामा खर्च लगानी गरेको देखिएको छ । स्रोत खुल्न नआएको ३ करोड ४ लाख ९४ हजार ३ सय आठ रुपियाँ बराबरको सम्पत्ति अवैध रहेको आयोगले ठहर गरेको छ ।

यस्तै आयोगले ठाकुरका नाममा राष्ट्रिय वाणिज्य बैंक सिमरामा रहेको मौज्दात २ करोड ७६ लाख ४४ हजार रुपियाँसमेत जफत गर्न माग गरेको छ । आयोगले बिगो असुल गरी हदैसम्मको कारवाहीको माग गर्दै विशेष अदालतमा मुद्दा दायर गरिएको प्रवक्ता प्रदीपकुमार कोइरालाले जानकारी दिए ।(nepalsamaj.com)

http://noc.org.np/