काठमाडौँ । भौतिक पूर्वाधार तथा यातायात मन्त्री नारायणकाजी श्रेष्ठले, सरकार व्यापार घाटा कम गर्ने आवश्यक प्रयासमा लागिरहेको दाबी गरेका छन् ।

बिहीबार राजधानीमा आयोजित नेपाल–इटाली चेम्बर अफ कमर्सको ९ औँ साधारण सभालाई सम्बोधन गर्दै, मन्त्री श्रेष्ठले, इटलीसँग मात्रै नभएर अन्य देशसँग समेत मुलुकको व्यापार घाटामा रहेको भन्दै घाटा न्यूनीकरणका लागि सरकारले आवश्यक प्रयास गरिरहेको बताए ।

६ दशक लामो कूटनीतिक सम्बन्धमा नेपालले इटलीबाट कति लाभ लिन सक्यो भन्ने कुराको समीक्षा हुनुपर्ने उनको भनाई छ ।

सरकार निजी क्षेत्रसँग हातेमालो गरेर अर्थतन्त्र सुधारका लागि आवश्यक प्रयास गर्न तयार रहेको उनले बताए ।
उनले भने ‘नेपाल र इटाली बीचका कूटनीतिक सम्बन्ध स्थापना भएको करिब ६ दशक पुग्न लाग्यो यसबाट कति लाभ लिन सक्यौ समीक्षा गर्न आवश्यक छ । नेपाली इटलीसँग हाम्रो व्यापार घाटा २ अरब ९६ करोड रुपैयाँ रहेको छ । सरकार र निजी क्षेत्र मिलेर दुई देशबिचको व्यापार अभिवृद्धि गर्ने उत्पादनको बजार सुनिश्चित गर्ने काम गर्न निजी क्षेत्रसँग हातेमालो गर्न सरकार तयार छ ।’

उनले नेपाल–इटाली चेम्बर अफ कमर्सले नेपाल र इटालीमा नागरिक स्तरमा सम्बन्ध विकासमा भूमिका खेल्नु पर्ने उनको भनाई छ ।