काठमाडौं। लक्ष्मी सनराइज बैंक लिमिटेडको नेतृत्वमा बैंक तथा वित्तीय संस्थाहरुले कालीगण्डकी गर्ज हाइड्रोपावर प्रा.लि.सँग १८० मेगावाट क्षमताको कालीगण्डकी गर्ज जलविद्युत आयोजनामा लगानी गर्ने सम्झौता गरेका छन्। यो आयोजना मुस्ताङ्ग र म्याग्दी जिल्लामा अवस्थित कालीगण्डकी नदीमा निर्माण हुनेछ। आयोजनाको कुल लागत रु. ३९ अर्ब ५० करोड २४ लाख रहेको छ। यसले नेपालको नविकरणीय उर्जा क्षेत्रमा ठूलो योगदान दिने अपेक्षा छ।

कालीगण्डकी गर्ज जलविद्युत आयोजनाले विद्युत उत्पादनको अनुमति विद्युत विकास विभागबाट फागुण २७, २०७५ मा प्राप्त गरिसकेको छ भने नेपाल विद्युत प्राधिकरणसँग विद्युत खरिद बिक्री सम्झौता फागुण १७, २०७९ मा गरिसकेको छ। यस आयोजनाको मुख्य प्रवद्र्धकको रूपमा संघई ग्रुप, विशाल ग्रुप र ज्ञानेन्द्र लाल प्रधान रहेका छन्।

लक्ष्मी सनराइज बैंकको नेतृत्वमा सहभागी बैंकहरुले परियोजना लागतको ७५ प्रतिशत लगानी गर्ने प्रतिवद्धता जनाएका छन्। बाँकी २५ प्रतिशत रकम कम्पनीका संस्थापक तथा सर्वसाधारणबाट लगानी गरिनेछ। लक्ष्मी सन्राइज बैंकले रु. ९ अर्ब, ग्लोबल आइएमई बैंकले रु. ७ अर्ब १२ करोड ६० लाख, सिद्धार्थ बैंकले रु. ५ अर्ब, हिमालयन बैंकले रु. ३ अर्ब, नेपाल एस.बि.आई. बैंकले रु. ३ अर्ब र एभरेष्ट बैंकले रु. २ अर्ब ५० करोड लगानी गर्नेछन्। कुल प्रोजेक्ट फाइनान्स रु. २९ अर्ब ६२ करोड ६० लाख रहेको छ।

यो आयोजना जुन २०२९ भित्र पूरा गरी विद्युत उत्पादन सुरु गरिनेछ। आयोजनाले वार्षिक करिब १०५६ गिगावाट आवर इनर्जी उत्पादन गरी राष्ट्रिय प्रसारण लाइनमा जडान गरिनेछ। यसले नेपालको ठूला स्वतन्त्र उर्जा उत्पादकहरु मध्ये एकको रूपमा स्थापित हुनेछ।