काठमाडौं । उद्योग, वाणिज्य तथा आपूर्तिमन्त्री दामोदर भण्डारीले औद्योगिक पूर्वाधारको विकास गर्नुपर्ने आवश्यकता रहेको बताएका छन् ।

आइतबार विकास, आर्थिक मामिला तथा सुशासन समितिको बैठकमा बोल्दै उनले खाद्य व्यापार तथा व्यवस्थापन कम्पनी लिमिटेडले अब जिल्लास्तरमा नै रैथाने बालीको संरक्षण गर्ने र ७५३ वटा पालिकाहरुसँग खाद्य व्यापार कम्पनीले सम्झौता गर्ने बताएका हुन् ।

उनले भने, ‘औद्योगिक पूर्वाधारको विकास गर्नुपर्ने छ । खाद्य व्यापार तथा व्यवस्थापन कम्पनी लिमिटेडले अब जिल्लास्तरमा नै रैथाने बालीको संरक्षण गर्ने र ७५३ वटा पालिकाहरुसँग खाद्य व्यापार कम्पनीले सम्झौता गरेको छ ।

ति पालिकामा उत्पादन भएका वस्तुहरुलाई खाद्य व्यापार तथा व्यवस्थापन कम्पनी लिमिटेडले खरिद गर्ने र त्यहाँ जे चिजको आवश्यकता छ त्यो खाद्य व्यापारले पूरा गर्ने योजनाका साथ काम गरिरहेको छ । अहिले करिब एकसय वटा पालिकाहरुसँग सम्झौता गरिसकिएको छ ।’

साथै उनले उद्योग, वाणिज्य तथा आपूर्तिमन्त्रालयसँग विनियोजित बजेट आठ अर्ब २० करोडको आसपासमा रहेको बताए । उनले जबसम्म नेपालको जिडिपिमा उद्योग र उद्यमशिलताको योगदान हुँदैन तबसम्म आजका चुनौतिहरुको सामना गर्न नसकिने बताएका छन् ।

उनले भने, ‘हामीले चुनौतिहरुलाई अवसरमा बदल्नुपर्छ । उद्योग, वाणिज्य तथा आपूर्तिमन्त्रालयसँग विनियोजित बजेटको ०.४ प्रतिशत हामीसँग बजेट छ । आठ अर्ब २० करोडको आसपासमा बजेट छ ।
कुनैबेला नेपालको जिडिपिमा १३ प्रतिशतको योगदान थियो उद्योग क्षेत्रको आज हामी पाँच प्रतिशतको आसपासमा छौं । जबसम्म नेपालको जिडिपिमा उद्योग र उद्यमशिलताको योगदान हुँदैन तबसम्म आजका चुनौतिहरुको सामना गर्न सकिँदैन । त्यसैले यसलाई विशेष प्राथमिकतामा राख्नुपर्छ ।’