काठमाडौं । व्यवसायी दीपक मल्होत्राले आगामी आर्थिक वर्ष २०८२/८३ का लागि सरकारले प्रस्तुत गरेको बजेटलाई सकारात्मक रूपमा स्वागत गरेका छन् । उनले बजेटलाई लगानीमैत्री, व्यवसाय प्रोत्साहनमुखी, र नीति स्थायित्वमा केन्द्रित रहेको बताए ।

मल्होत्राका अनुसार सरकारले प्रस्तुत गरेको बजेटले निजी क्षेत्रका करिब ७०–८० प्रतिशत माग समेटेको छ । उनले भने, “बजेट एकदमै राम्रो छ । सबै निजी क्षेत्रका समस्या वा अधिकांश माग बजेटले सम्बोधन गरेको देखिन्छ ।”

विशेषतः रियलस्टेट क्षेत्रको सशक्तिकरणतर्फ सरकारले चालेको कदमलाई मल्होत्राले सकारात्मक संकेतका रूपमा व्याख्या गरे । उनले बताएअनुसार, निजी क्षेत्रको साझा धारणा अनुसार रियलस्टेट क्षेत्रमा जीवन्तता ल्याउन स्पष्ट नीति तय गरिएको छ । “हामीले चेम्बरमार्फत अर्थतन्त्र सक्रिय बनाउन रियलस्टेट प्रवर्द्धनको माग गरेका थियौं, जुन बजेटमा समेटिएको छ,” उनले स्पष्ट पारे ।

त्यसैगरी, उनले बजेटले दीर्घकालीन नीति स्थायित्वको आवश्यकता बुझेर त्यसतर्फ पहल गरेको भन्दै सरकारको प्रयासको प्रशंसा गरे । “निजी क्षेत्रले स्थिर नीतिको अपेक्षा गरेको थियो, बजेटमा त्यसको संकेत देखिन्छ,” उनले बताए ।

यद्यपि, मल्होत्राले बजेटको सफलताको प्रमुख पक्ष यसको कार्यान्वयनमा निर्भर हुने उल्लेख गरे । “नीति मात्रै हैन, त्यसको प्रभावकारी कार्यान्वयनमा पनि ध्यान दिनुपर्ने बेला आएको छ,” भन्दै उनले सरकारलाई दृढ कार्यान्वयन प्रतिबद्धता देखाउन सुझाव दिए ।

अन्त्यमा, उनले नीति स्थायित्व र प्रभावकारी कार्यान्वयनको अभाव भएमा बजेटका लक्ष्यहरू प्राप्त गर्न कठिन हुने चेतावनी दिंदै सरकारलाई जिम्मेवार बन्न आह्वान गरे ।