काठमाडौं । नेपालका अग्रणी डिजिटल भुक्तानी प्लेटफर्म फोनपेले नेपाल प्रिमियर लिग (एनपीएल) सिजन–२ का लागि काठमाडौं गोर्खाजसँग प्लाटिनम प्रायोजकको रूपमा साझेदारी गर्ने घोषणा गरेको छ।

यस सहकार्य मार्फत फोनपेले राष्ट्रिय खेलकुदको प्रवर्द्धन, स्थानीय प्रतिभाको विकास, र देशभरका समुदायसँगको संलग्नतालाई अझ बलियो बनाउने अपेक्षा व्यक्त गरेको छ। प्रायोजनले युवालाई सशक्त बनाउने र खेलकुदमार्फत एकता, अनुशासन तथा उत्साहको संस्कृतिलाई प्रवर्द्धन गर्ने फोनपेको दीर्घदृष्टिसँग मेल खाने बताइएको छ।

फोनपेका सीईओ दिवासकुमारले भने, “हामी एनपीएल सिजन–२ मा काठमाडौं गोर्खाजलाई समर्थन गर्न पाउँदा गर्व गर्छौँ। खेलकुदले मानिसहरूलाई एकत्रित गर्छ र यस्तै भावना बोकेको टोलीसँग साझेदारी गर्न पाउँदा हामी उत्साहित छौँ। हाम्रो पहलले युवालाई प्रेरणा दिने, राष्ट्रिय गौरव बढाउने, र सुरक्षित तथा सहज डिजिटल भुक्तानी प्रयोगलाई प्रवर्द्धन गर्नेछ।”

काठमाडौं गोर्खाजले फोनपेप्रति आभार व्यक्त गर्दै, यो समर्थनले टोलीलाई आगामी प्रतिस्पर्धात्मक सिजनका लागि थप उर्जावान र आत्मविश्वासी बनाउने जनाएको छ।