पाटन,ललितपुर। योमरी पुन्हिको अवसरमा भीड भरिएको बंगलामुखी परिसरमा संघीय सरकारका सञ्चार तथा सूचना प्रविधिमन्त्री जगदीश खरेल अचानक आइपुगेपछि स्थानीय नागरिक उत्साहित बने । सिंहदरबारमै भेट्न कठिन ठानिने मन्त्रीलाई घर–टोलमै पाउँदा भक्तजन, सर्वसाधारण र जनप्रतिनिधि सबै चकित र खुसी देखिए ।

स्थानीय प्रर्णव श्रेष्ठले मन्त्रीलाई प्रत्यक्ष भेटेर समस्या राख्न पाउनु ‘भाग्यको कुरा’ भएको बताए । यमरी पकाउँदै गरेकी रेणु महर्जनदेखि ८७ वर्षीय बाबुलाल महर्जनसम्मले मन्त्रीले आफूहरूसँगै बस्दै पीर–मर्का सुनेको अनुभव अविश्वसनीय भएको बताए । मन्त्रीको घरदैलो भेटघाट अभियान नागरिकमैत्री अनुभूति भएको उनीहरूको भनाइ छ ।

मन्त्री खरेलले बंगलामुखी मन्दिर, गुठी, ढुंगेधारा तथा आसपासको संरचना निरीक्षण गर्दै स्थानीयको समस्या सुने, सुझाव लिए र संचार तथा भौतिक संरचना सुधारका आवश्यकताबारे जनप्रतिनिधिसँग पनि छलफल गरे । वडा अध्यक्षलगायत प्रतिनिधिहरूले तार व्यवस्थापन र सञ्चार सेवा प्रभावकारी बनाउन माग राखेका थिए ।

मन्त्री खरेलले जनताको घरटोलमै पुगेर आवाज सुन्ने काम आगामी दिनमा पनि निरन्तर चलिरहने प्रतिबद्धता जनाउँदै भने–
“अब सिंहदरबार मात्रै होइन, मन्त्रीहरू नागरिककै घरदैलोमा पुग्नेछन् । जनताको पीडा सुन्दा मात्र मन्त्री भएको अनुभूति हुन्छ ।”

बिहीबारको दिन विशेष दर्शन हुने बंगलामुखी शक्तिपीठमा योमरी पुन्हिका कारण भीड बाक्लो थियो । त्यही भीडबीच मन्त्री स्वयं नागरिकबीच पुगेको दृश्यले ‘सरकार नजिकिएको’ भावना सर्वसाधारणमा पलाएको देखियो ।