काठमाडौँ । एन.पि.आई. नारायणी सामुदायिक हस्पिटल लिमिटेडले निकट भविष्यमा आफ्नो प्राथमिक शेयर सर्वसाधारणका लागि सार्वजनिक निष्काशन गर्ने भएको छ। कम्पनीले यसका लागि शेयर निष्काशन तथा विक्री प्रबन्धकको रूपमा नबिल इन्भेष्टमेण्ट बैंकिङ्ग लिमिटेडलाई नियुक्त गरेको छ।

कम्पनीको जारी पूँजी ३ अर्ब ५० करोड रुपैयाँ रहेको छ, जसको २० प्रतिशत शेयर सर्वसाधारणमा निष्काशन गरिनेछ भने ८० प्रतिशत शेयर संस्थापक समूहकैमा कायम रहनेछ। कम्पनीका सञ्चालक श्री चुडामणी खनालले भने, “हामी निर्माणको अन्तिम चरणमा रहेको ४०० शैयाको जनरल र क्यान्सर हस्पिटलका लागि थप पूँजी जुटाउन सार्वजनिक निष्काशनमा जाने तयारीमा छौँ।”

हस्पिटलले वि.सं. २०६३ मा स्थापना भएको हो र हाल यसको वार्षिक कारोबार १.१५ अर्ब रुपैयाँ पुगेको छ। संस्थामा ४२५ भन्दा बढी कर्मचारी कार्यरत छन्।

आज भएको सम्झौतामा कम्पनीका तर्फबाट श्री चुडामणी खनाल र नबिल इन्भेष्टमेण्ट बैंकिङ्ग लिमिटेडका मुख्य कार्यकारी अधिकृत श्री मनिष नारायण जोशीले हस्ताक्षर गर्नुभएको थियो। कार्यक्रममा निष्काशन कम्पनीका तर्फबाट श्री विष्णु कुँवर र श्री निरज कुमार श्रेष्ठको पनि उपस्थिति रहेको थियो।