काठमाडौँ । ओमोडा एन्ड जेइको ईभीको नेपालका लागि आधिकारिक बिक्रेता एसपीजी अटोमोबाइल्सले नेपाल राष्ट्रिय क्रिकेट टोलीका कप्तान रोहित पौडेललाई आफ्नो नयाँ ब्रान्ड एम्बेसडरको रूपमा नियुक्त गरेको छ। भव्य समारोहबीच जेइको जे५ हस्तान्तरण कार्यक्रमसँगै उक्त सम्झौताको औपचारिक घोषणा गरिएको हो।

कार्यक्रममा ब्रान्डका पुराना एम्बेसडर तथा चर्चित क्रिकेट खेलाडी दिपेन्द्र सिंह ऐरीलाई पनि सम्मान गरिएको थियो। एसपीजी अटोमोबाइल्सले रोहितलाई बहुप्रतिक्षित जेइको जे५ इलेक्ट्रिक एसयूभी प्रदान गरेको छ, जसको बजार मूल्य करिब ५७ लाख रुपैयाँ रहेको छ।

जेइको जे५ एक प्रिमियम इलेक्ट्रिक एसयूभी हो, जसले विलासिता र अफ–रोड क्षमतालाई एकसाथ समेटेको छ। यसमा विशाल हाई–डेफिनिसन इन्फोटेनमेन्ट सिस्टमसहितको स्मार्ट ककपिट रहेको छ। शून्य–उत्सर्जन दक्षता कायम राख्दै नेपालको विविध भू–बनोटमा सहज रूपमा चल्ने गरी डिजाइन गरिएको यस गाडीमा ४६१ किलोमिटरको रेन्ज, १८५ एमएम ग्राउन्ड क्लियरेन्स, १५५ किलोवाट मोटर पावर, स्पेयर टायर र ४८८ लिटर बुट–स्पेस जस्ता विशेषताहरू छन्।

ब्रान्ड एम्बेसडर नियुक्तिसँगै रोहित पौडेलले नेपाली बजारमा इलेक्ट्रिक सवारीसाधनप्रति जनचेतना बढाउन आफू सकारात्मक भूमिका खेल्ने विश्वास व्यक्त गरेका छन्।