काठमाडौं । सरकारले पूर्व सचिव गणेश पाण्डेलाई नेपाल बीमा प्राधिकरणको नयाँ सञ्चालकमा नियुक्त गर्ने निर्णय गरेको छ। मन्त्रिपरिषद् निर्णयअनुसार पाण्डेलाई आगामी चार वर्षका लागि प्राधिकरणको सञ्चालकमा नियुक्त गरिएको हो।

पाण्डे यसअघि पनि नेपाल बीमा प्राधिकरणमा सञ्चालकको जिम्मेवारी सम्हालिसकेका व्यक्ति हुन्। यसपटक उनी जीवन बीमा समूहबाट प्रतिनिधित्व गर्दै सञ्चालकमा नियुक्त भएका छन्।

नियुक्तिपछि सञ्चालक पाण्डेले कार्यभार सम्हाल्नेबित्तिकै प्राधिकरणका दैनिक कामकारबाही थप तीव्र गतिमा अघि बढ्ने विश्वास गरिएको छ। बीमा क्षेत्रको नियमन, सुशासन तथा सुधारका विषयमा उनको अनुभव उपयोगी हुने अपेक्षा गरिएको छ।

पाण्डेसँग वाणिज्य मन्त्रालय, अर्थ मन्त्रालय, संस्कृति मन्त्रालयलगायत विभिन्न सरकारी निकायमा कार्य गरेको लामो प्रशासनिक अनुभव रहेको छ। सार्वजनिक प्रशासन र नीति निर्माणमा उनको दक्षताले बीमा क्षेत्रलाई थप सुदृढ बनाउन सहयोग पुग्ने सरोकारवालाहरूको बुझाइ छ।

नेपाल बीमा प्राधिकरणले बीमा क्षेत्रको नियमन, विकास तथा बीमितको हित संरक्षण गर्ने जिम्मेवारी निर्वाह गर्दै आएको छ। पाण्डेको नियुक्तिसँगै प्राधिकरणको सञ्चालक समितिले थप अनुभव र नेतृत्व क्षमता प्राप्त गरेको विश्वास गरिएको छ।