काठमाडौं । नेपालका लागि म्याक्सस इलेक्ट्रिक भेहिकलको आधिकारिक वितरक हिमालय मोट्रोक्स प्रालिले तीन नयाँ प्रिमियम ईभी मोडलको नयाँ मूल्य सार्वजनिक गरेको छ।

कम्पनीले नेपाली बजारमा उपलब्ध म्याक्सस ई–टेरोन ९ लक्जरी मोडेलको मूल्य रु. १ करोड १० लाख निर्धारण गरेको छ। त्यस्तै ई–टेरोन ९ प्रिमियमको मूल्य रु. १ करोड १८ लाख र सात सिट क्षमतायुक्त म्याक्सस मिफा ७ प्रिमियम एमपीभीको मूल्य रु. १ करोड २४ लाख ९९ हजार तोकिएको छ।

मूल्यसमेत अद्यावधिक गर्दै कम्पनीले नेपालभर ग्राहक पहुँच विस्तारको लक्ष्यसहित डिलर नेटवर्क विस्तारको घोषणा पनि गरेको छ। कम्पनीका अनुसार हाल काठमाडौं, पोखरा, विराटनगर र बिर्तामोडमा म्याक्सस सवारीसाधन खरिद गर्न सकिनेछ।

त्यस्तै बुटवल, नारायणघाट र नेपालगञ्जमा नयाँ शोरुम सञ्चालनको तयारी अन्तिम चरणमा पुगेको कम्पनीले जनाएको छ।

ग्राहक सेवाको सहजताका लागि कम्पनीले स्वयम्भू र धोबीघाट (काठमाडौं) मा सेवा केन्द्र सञ्चालनमा ल्याएको छ भने पोखरा, विराटनगर र बिर्तामोडमा पनि सर्भिस सुविधा उपलब्ध छ।

म्याक्सस ई–टेरोन ९ मध्ये जडित १०२.२ किलोवाट आवर ब्याट्रीले एकपटकको पूर्ण चार्जमा ५६० किलोमिटरको रेन्ज दिने एनईडिसी प्रमाणन प्राप्त छ। उन्नत प्रविधि र उच्च प्रदर्शनका कारण म्याक्ससको ई–टेरोन सवारी विद्युतीय पिकअप सेग्मेन्टमा आकर्षणका रूपमा उभिएको छ।