काठमाडौं । सन नेपाल लाइफ इन्स्योरेन्स कम्पनी लिमिटेडले चालू आर्थिक वर्षको दोस्रो त्रैमासिक वित्तीय विवरण सार्वजनिक गरेको छ। विवरण अनुसार कम्पनीले चालू आर्थिक वर्षको पहिलो ६ महीनामा २८ करोड ५४ लाख रुपैयाँ खुद नाफा कमाएको छ।

गत आर्थिक वर्षको सोही अवधिमा कम्पनीले २८ करोड २२ लाख रुपैयाँ खुद नाफा कमाएको थियो। त्यसको तुलनामा चालू आर्थिक वर्षमा कम्पनीको नाफा १.११ प्रतिशतले वृद्धि भएको हो। आम्दानीमा भएको बढोत्तरीले नाफा बढ्न सहयोग पुगेको कम्पनीले जनाएको छ।

गत आर्थिक वर्षको पुस मसान्तसम्म २ अर्ब १८ करोड ६२ लाख रुपैयाँ खुद बीमाशुल्क आर्जन गरेको कम्पनीले चालू आर्थिक वर्षको सोही अवधिमा ३.६४ प्रतिशत वृद्धि गर्दै २ अर्ब २६ करोड ५८ लाख रुपैयाँ बीमाशुल्क आर्जन गरेको छ।

यद्यपि समीक्षा अवधिमा कम्पनीको कुल आम्दानी भने घटेको छ। कुल आम्दानी २ अर्ब ९४ करोड २० लाख रुपैयाँबाट ११.२२ प्रतिशतले घटेर २ अर्ब ६१ करोड २० लाख रुपैयाँमा सीमित भएको छ। आम्दानी घटेसँगै कम्पनीले खर्च पनि घटाएको छ। कुल खर्च २ अर्ब ६६ करोड रुपैयाँबाट १३.५८ प्रतिशतले घटेर २ अर्ब २९ करोड ८६ लाख रुपैयाँ कायम भएको छ।

समीक्षा अवधिमा कम्पनीको जीवन बीमा कोष ८ अर्ब ९६ करोड ९४ लाख रुपैयाँबाट बढेर ११ अर्ब ४ करोड ७९ लाख रुपैयाँ पुगेको छ। प्रतिशेयर आम्दानी १४.२५ रुपैयाँबाट घटेर ११.३० रुपैयाँमा झरेको छ भने सोल्भेन्सी मार्जिन रेशियो २.३३ प्रतिशतबाट बढेर २.४३ प्रतिशत कायम भएको छ। कम्पनीको प्रतिशेयर नेटवर्थ १४७.२८ रुपैयाँ रहेको छ।

कम्पनीले चालू आर्थिक वर्षको ६ महीनामा बीमा पोलिसी नवीकरणमार्फत १ अर्ब ५६ करोड ८ लाख रुपैयाँ आम्दानी गरेको जनाएको छ। ५ अर्ब ३ करोड १२ लाख रुपैयाँ चुक्ता पूँजी रहेको कम्पनीको शेयर प्रिमियम १ अर्ब ३० करोड २२ लाख रुपैयाँ, महाविपत्ति कोषमा २३ करोड ६१ लाख रुपैयाँ, जगेडा कोषमा ५४ करोड ८५ लाख रुपैयाँ र अन्य इक्विटीमा २९ करोड २० लाख रुपैयाँ सञ्चित रहेको छ।