काठमाडौं । सूर्यज्योति लाइफ इन्स्योरेन्स कम्पनी लिमिटेडले चालू आर्थिक वर्षको दोस्रो त्रैमासिक वित्तीय विवरण सार्वजनिक गरेको छ। विवरण अनुसार कम्पनीको आम्दानीसँगै नाफामा पनि वृद्धि भएको छ।

गत आर्थिक वर्षको सोही अवधिमा १९ करोड ६१ लाख रुपैयाँ खुद नाफा कमाएको कम्पनीले चालू आर्थिक वर्षको पुस मसान्तसम्म २.९२ प्रतिशत वृद्धि गर्दै २० करोड १८ लाख रुपैयाँ खुद नाफा आर्जन गरेको छ।

समीक्षा अवधिमा कम्पनीको खुद बीमाशुल्क आर्जन १४.६३ प्रतिशतले बढेर ४ अर्ब ९८ करोड १६ लाख रुपैयाँबाट ५ अर्ब ७१ करोड २ लाख रुपैयाँ पुगेको छ। कम्पनीको कुल आम्दानी ७ अर्ब रुपैयाँबाट बढेर ७ अर्ब ७० करोड २१ लाख रुपैयाँ पुगेको छ भने कुल खर्च पनि ६ अर्ब ६४ करोड ९ लाख रुपैयाँबाट बढेर ७ अर्ब ३५ करोड ४१ लाख रुपैयाँ पुगेको छ।

यस अवधिमा कम्पनीले अभिकर्तालाई दिएको कमिसन रकम ४४ करोड १८ लाख रुपैयाँबाट बढेर ४९ करोड १६ लाख रुपैयाँ पुगेको छ। साथै जीवन बीमा कोषको आकार ३७ अर्ब ७३ करोड ४० लाख रुपैयाँबाट बढेर ४६ अर्ब १७ करोड १० लाख रुपैयाँ पुगेको छ।

कम्पनीको प्रतिशेयर आम्दानी ७.८३ रुपैयाँबाट बढेर ८.०६ रुपैयाँ कायम भएको छ भने प्रतिशेयर नेटवर्थ १२३.३३ रुपैयाँ रहेको छ। कम्पनीको मूल्य–आम्दानी अनुपात ५५.६९ गुणा रहेको छ।

चालू आर्थिक वर्षको पहिलो ६ महिनामा कम्पनीले बीमा पोलिसी नवीकरणमार्फत ४ अर्ब २२ करोड ८४ लाख रुपैयाँ आम्दानी गरेको जनाएको छ।

५ अर्ब १ करोड १९ लाख रुपैयाँ चुक्ता पूँजी रहेको कम्पनीको महाविपत्ति कोषमा ४४ करोड २ लाख रुपैयाँ, जगेडा कोषमा ४५ करोड २८ लाख रुपैयाँ र अन्य इक्विटीमा २७ करोड ६० लाख रुपैयाँ सञ्चित रहेको छ। कम्पनीको सोल्भेन्सी मार्जिन रेशियो १.६५ प्रतिशत रहेको छ।