काठमाडौं । नेपाल अटोमोबाइल इम्पोर्टर्स एन्ड म्यानुफ्याक्चरर्स एसोसिएशन (नाइमा) ले ‘ट्याक्सीको रूपमा प्रयोग हुने सवारी सम्बन्धी राष्ट्रिय मापदण्ड २०८१’ कार्यान्वयनका सन्दर्भमा देखिएका केही व्यवहारिक तथा नीतिगत विषयबारे आफ्ना सुझावहरू भौतिक पूर्वाधार तथा यातायात मन्त्रालय समक्ष पेश गरेको छ।

नाइमाले ट्याक्सी सेवा मापदण्ड, २०८१ अनुसार ट्याक्सी सेवालाई साधारण, विशेष र विशिष्ट गरी तीन वर्गमा वर्गीकरण गरिएको र ती वर्गअन्तर्गत तोकिएका प्राविधिक, सुरक्षा तथा सेवा सम्बन्धी सबै विशिष्टिकरणहरू पूरा गर्ने सवारी साधनलाई ट्याक्सी सेवामा समावेश गर्न सकिने स्पष्ट व्यवस्था रहेको उल्लेख गरेको छ।

संघका अनुसार हाल बाग्मती प्रदेश मा व्यवहारमा सिडान प्रकारका सवारी साधनलाई मात्र ट्याक्सी सेवाको अनुमति दिइएको देखिन्छ। तर राष्ट्रिय मापदण्डले सिडानमा मात्र सीमित नगरेको भन्दै अन्य उपयुक्त, यात्रुमैत्री तथा आवश्यकताअनुसारका सवारी साधनलाई पनि समावेश गर्नुपर्ने नाइमाको धारणा छ।

नाइमाले सिडान बाहेकका सवारी साधनहरूलाई ट्याक्सी सेवाबाट बाहिर राख्नुको स्पष्ट आधार नदेखिएको उल्लेख गर्दै, मापदण्डमा तोकिएका सबै शर्तहरू पूरा गर्ने विभिन्न सवारी वर्गलाई अनुमति दिइएमा सेवा प्रदायकलाई लचकता मिल्ने र यात्रुहरूलाई पर्याप्त सुविधा, सामान राख्ने स्थान, पहुँचयोग्यता (अपाङ्गता मैत्री) तथा समूहअनुसार विकल्प उपलब्ध हुने जनाएको छ।

पत्रमा विश्वका विभिन्न देशहरूमा विभिन्न आकार र वर्गका सवारी साधनमार्फत ट्याक्सी सेवा सञ्चालन भइरहेको उदाहरण पनि प्रस्तुत गरिएको छ। नेपालका केही सहरहरूमा फरक वर्गका सवारी साधनलाई अनुमति दिइएको भए पनि बागमती प्रदेशमा सो व्यवस्था लागू नभएको कारण व्यवहारिक असमानता देखिएको नाइमाको भनाइ छ।

नाइमाले राष्ट्रिय मापदण्डमा उल्लेखित सबै प्राविधिक, सुरक्षा र सेवा सम्बन्धी विशिष्टिकरणहरू पूरा गर्ने साधारण, विशेष र विशिष्ट वर्गका सवारी साधनलाई ट्याक्सी सेवामा अनुमति प्रदान गरिनु न्याय, समानता र सेवा विस्तारका दृष्टिले उपयुक्त हुने सुझाव दिएको छ। मन्त्रालयसँग सहकार्य गर्दै सुरक्षित, गुणस्तरीय र यात्रुमैत्री ट्याक्सी सेवा प्रवर्द्धनमा आफू प्रतिबद्ध रहेको संघले जनाएको छ।