काठमाडौं । २१ फागुनमा हुने प्रतिनिधिसभा सदस्य निर्वाचनका लागि देशभरका १६५ निर्वाचन क्षेत्रमा कुल २ लाख २१ हजार कर्मचारी खटाइएको निर्वाचन आयोग ले जनाएको छ।

आयोगका अनुसार १६५ निर्वाचन क्षेत्रअन्तर्गत २३ हजार ११२ मतदान केन्द्र तथा समानुपातिकतर्फ मात्र मतदान हुने १४३ अस्थायी केन्द्रमा उक्त संख्यामा कर्मचारी परिचालन गरिएको हो। पाँच सयभन्दा बढी मतदाता रहेका मतदान केन्द्रमा नौ जना र ५०० भन्दा कम मतदाता भएका केन्द्रमा आठ जना कर्मचारी खटाइएको आयोगले स्पष्ट पारेको छ।

निर्वाचनका लागि मतदान समय बिहान ७ बजेदेखि बेलुकी ५ बजेसम्म तोकिएको छ। मतदान व्यवस्थापनका लागि मुख्य निर्वाचन अधिकृतदेखि सहयोगी कर्मचारीसम्म व्यापक जनशक्ति परिचालन गरिएको आयोगको भनाइ छ।

सुरक्षातर्फ नेपाली सेना, नेपाल प्रहरी, सशस्त्र प्रहरी बल नेपाल, राष्ट्रिय अनुसन्धान विभाग तथा निर्वाचन प्रहरी गरी करिब ३ लाख ३९ हजार सुरक्षाकर्मी खटाइएको आयोगले जानकारी दिएको छ।

आयोगका अनुसार निर्वाचनमा संघका कर्मचारीलाई पहिलो प्राथमिकतामा राखिएको छ। त्यसपछि प्रदेश तथा स्थानीय तहका कर्मचारी परिचालन गरिएको छ भने केही स्थानमा आवश्यकताअनुसार शिक्षकहरूलाई समेत खटाइएको जनाएको छ।

निर्वाचनमा खटिने कर्मचारीलाई शतप्रतिशत सुविधा उपलब्ध गराइनुका साथै २० लाख रुपैयाँसम्मको बिमा व्यवस्था गरिएको आयोगले स्पष्ट पारेको छ।