काठमाडौं । भारतीय अटो निर्माता टाटा मोटर्स ले सन् २०२६ मा तीन नयाँ इलेक्ट्रिक कार सार्वजनिक गर्ने तयारी गरेको छ। कम्पनीले हालै सार्वजनिक गरेको टाटा पन्च ईभी पछि अब टाटा टियागो ईभी को फेसलिफ्ट संस्करण, प्रिमियम सब-ब्रान्ड अभिन्या अन्तर्गतको मोडल र टाटा सिएरा ईभी ल्याउने योजना बनाएको हो।

कम्पनीको सबैभन्दा किफायती इलेक्ट्रिक कारका रूपमा चिनिएको टियागो ईभी नयाँ अवतारमा आउने तयारीमा छ। फेसलिफ्ट मोडल परीक्षणका क्रममा देखिएको छ। नयाँ संस्करणमा एलईडी हेडलाइट, आकर्षक डे–टाइम रनिङ लाइट (DRL) र नयाँ बम्परजस्ता डिजाइन परिवर्तन देखिन सक्नेछन्। साथै, पहिलोपटक ३६० डिग्री क्यामेरा र सनरुफजस्ता सुविधा समावेश हुन सक्ने चर्चा छ।

इन्टेरियरमा ठूलो टचस्क्रिन डिस्प्ले र नयाँ स्टेयरिङ ह्विल उपलब्ध गराइने अपेक्षा गरिएको छ। ब्याट्री क्षमतामा पनि सुधार भई करिब ३० किलोवाट–आवरसम्मको ठूलो ब्याट्री प्रयोग हुन सक्ने अनुमान गरिएको छ।

यसैबीच, अभिन्या सब-ब्रान्ड अन्तर्गतको पहिलो प्रिमियम इलेक्ट्रिक कार सन् २०२६ को अन्त्यसम्म लन्च हुने तयारीमा छ। यो गाडी जागुआर ल्याण्ड रोभर को विशेष ईएमए प्लेटफर्ममा आधारित हुने बताइएको छ। स्पोर्टब्याक शैलीको डिजाइनका कारण यसको लुक्स आकर्षक हुने अपेक्षा गरिएको छ।

त्यसैगरी, सिएरा ईभी सन् २०२६ को अप्रिलदेखि जुन अवधिमा सार्वजनिक हुन सक्ने अनुमान गरिएको छ। कम्पनीले यसअघि सिएराको पेट्रोल तथा डिजेल संस्करण ल्याइसकेको छ भने अब यसको इलेक्ट्रिक संस्करण ल्याउने तयारी गरेको हो। सिएरा ईभीमा दुई वा तीनवटा ब्याट्री विकल्प उपलब्ध हुन सक्नेछन्, जसले एकपटक फुल चार्ज गर्दा ४५० देखि ५०० किलोमिटरभन्दा बढी रेन्ज दिने अपेक्षा गरिएको छ। डिजाइनका हिसाबले यो पेट्रोल तथा डिजेल सिएरासँग मिल्दोजुल्दो भए पनि केही आधुनिक परिवर्तन गरिने अनुमान गरिएको छ।