काठमाडौं । कुमारी बैंक लिमिटेड ले संस्थापक शेयरधनीको नाममा रहेको ३ हजार ४१ कित्ता संस्थापक शेयर बिक्रीमा राखेको छ। बैंकले उक्त शेयर हाल विद्यमान संस्थापक शेयरधनीहरूका लागि मात्र खुला गरेको जनाएको छ।

नेपाल राष्ट्र बैंक बाट जारी निर्देशन बमोजिम संस्थापक शेयर खरिद गर्ने पहिलो हक विद्यमान संस्थापक शेयरधनीहरूमा नै रहने व्यवस्था छ। सोही व्यवस्था अनुसार बैंकले इच्छुक संस्थापक शेयरधनीहरूलाई आवेदन दिन ३५ दिनको समयावधि प्रदान गरेको छ।

शेयर खरिद गर्न इच्छुक संस्थापक शेयरधनीहरूले काठमाडौंको नक्सालस्थित कुमारी क्यापिटल लिमिटेड (बैंकको शेयर रजिष्ट्रार) वा टंगालस्थित बैंकको प्रधान कार्यालयमा निवेदन दिनुपर्नेछ। शेयरको बिक्री मूल्य भने बिक्रेताले तोकेबमोजिम हुने बैंकले जनाएको छ।

तोकिएको समयसीमाभित्र विद्यमान संस्थापक शेयरधनीहरूबाट आवेदन नपरेमा उक्त शेयर सर्वसाधारणका लागि बिक्री प्रक्रिया अघि बढाइने पनि बैंकले स्पष्ट पारेको छ।