नेपालको पहिलो बैंक नेपाल बैंक लिमिटेडले समावेशी तथा पहुँचयोग्य बैंकिङ सेवा सम्बन्धी व्यवस्थालाई कार्यान्वयन गर्दै आफ्नो आधिकारिक वेबसाइटलाई अपाङ्गतामैत्री बनाएको छ। बैंकले दृष्टिविहीन तथा अन्य प्रकारका अपाङ्गता भएका व्यक्तिहरूले सहज रूपमा डिजिटल बैंकिङ सेवा उपयोग गर्न सक्ने व्यवस्था गर्दै आफ्नो वेबसाइटमा विभिन्न पहुँचमैत्री सुविधाहरू समावेश गरी सबै वर्गका ग्राहकहरूका लागि समान पहुँचको सुनिश्चितता गरेको छ।

नयाँ व्यवस्था अन्तर्गत वेबसाइटमा स्क्रिन रिडर (Screen Reader) मैत्री संरचना, अक्षरको आकार परिवर्तन गर्न मिल्ने सुविधा (Font Size Change), उच्च कन्ट्रास्ट (High Contrast) को विकल्प तथा दृष्टिविहीन र न्यून दृष्टि भएका व्यक्तिहरूलाई लक्षित गरी अन्य आवश्यक पहुँचसम्बन्धी सुविधाहरू समावेश गरिएका छन्। समावेशी बैंकिङ सेवाप्रति बैंक सधैँ प्रतिबद्ध रहेको र सबै नागरिकलाई सहज, सुरक्षित तथा पहुँचयोग्य वित्तीय सेवा उपलब्ध गराउने आफ्नो दायित्वलाई निरन्तर सुदृढ गर्दै लैजाने विश्वास बैंकले व्यक्त गरेको छ।

नेपालभर २३१ शाखाहरू, २४६ एिटिएमका साथै ६१ एक्सटेन्सन काउन्टरमार्फत करिब २७ लाख ग्राहकहरूलाई वित्तीय सेवा पुर्‍याइरहेको यस बैंकले हाल ग्राहक सेवामा व्यापक सुधार गरी आधुनिक बैंकिङ प्रविधिमार्फत बैंकिङ सेवा पुर्‍याउँदै प्रतिस्पर्धी रूपमा अगाडि बढिरहेको छ। बैंकले छिटोछरितो र गुणस्तरीय ग्राहक सेवामा जोड दिई युवा जनशक्तिमार्फत नेपालभर बैंकिङ सेवा प्रदान गरिरहेको छ। कुशल व्यवस्थापन, युवा कर्मचारी र आधुनिक प्रविधिको समुचित प्रयोग भएसँगै आम नेपालीमा नेपालको पहिलो बैंक नेपाल बैंकप्रतिको आकर्षण दिनप्रतिदिन बढ्दै गएको छ।