काठमाडौं।द ब्रिटिश कलेज, काठमाडौंले कलेजविरुद्ध सामाजिक सञ्जाल तथा केही आम सञ्चार माध्यममार्फत फैलाइएका भ्रामक सूचना र आरोपप्रति ध्यानाकर्षण गराउँदै ती आरोपहरू असत्य, आधारहीन र मानहानीपूर्ण रहेको स्पष्ट गरेको छ। कलेजले मंगलबार प्रेस विज्ञप्ति जारी गर्दै आफ्नो शैक्षिक, कानुनी र नैतिक मापदण्डप्रति पूर्ण प्रतिबद्धता व्यक्त गरेको हो।

कलेजका अनुसार द ब्रिटिश कलेज नेपालका सम्बन्धित नियामक निकायको स्वीकृतिमा सञ्चालन हुँदै आएको प्रतिष्ठित शैक्षिक संस्था हो र अन्तर्राष्ट्रिय रूपमा मान्यता प्राप्त विश्वविद्यालयहरूसँग सहकार्यमा शैक्षिक कार्यक्रम सञ्चालन गरिरहेको छ। दुबईस्थित द वुलविच इन्स्टिच्युट पनि त्यहाँका नियामक निकायको स्वीकृतिमा सञ्चालनमा रहेको स्वतन्त्र शैक्षिक संस्था भएको कलेजको दाबी छ।

विज्ञप्तिमा Hospitality Management Foundation तथा Higher National Diploma (HND) कार्यक्रम अन्तर्राष्ट्रिय रूपमा मान्यता प्राप्त रहेको उल्लेख गर्दै HND पूरा गरेपछि विद्यार्थीलाई दुबई, बेलायत वा अष्ट्रेलियाका साझेदार संस्थामा अध्ययन गर्न सक्ने अवसर उपलब्ध गराइने जानकारी दिइएको छ। इन्टर्नसिपको अवसर उपलब्ध गराइए पनि त्यसको ग्यारेन्टी नहुने कुरा भर्ना अगावै स्पष्ट गराइने पनि कलेजले जनाएको छ।

कलेजका अनुसार करिब ५१ जना Hospitality Management विद्यार्थीमध्ये ९ जना विद्यार्थी व्यक्तिगत कारणले तीन महिनापछि नेपाल फर्किएका थिए। उनीहरूसँग तथा अभिभावकसँग छलफल गरी समस्या समाधानको प्रयास गरिएको र त्यसबेला सकारात्मक प्रतिक्रिया प्राप्त भएको कलेजको भनाइ छ।

साथै, केही विद्यार्थी तथा बाह्य समूहले सामाजिक सञ्जालको दुरुपयोग गर्दै कलेजविरुद्ध भ्रामक सामग्री प्रसारण गरेको, कार्यालयमा अवरोध सिर्जना गरेको र शैक्षिक गतिविधिमा असर पुर्‍याएको आरोप कलेजले लगाएको छ। यसका कारण कलेजले शैक्षिक वातावरण सुरक्षित राख्न सुरक्षानिकायको सहयोग लिनुपरेको जनाएको छ।

कलेजले आफूविरुद्ध लगाइएका शोषण वा मानव तस्करीसम्बन्धी सबै आरोप पूर्ण रूपमा अस्वीकार गर्दै यस्ता आरोप निन्दनीय भएको उल्लेख गरेको छ। द ब्रिटिश कलेजले हाल सबै शैक्षिक कार्यक्रम नियमित रूपमा सञ्चालन भइरहेको र विद्यार्थी तथा अभिभावकलाई अपुष्ट सूचनामा विश्वास नगर्न अनुरोध गरेको छ। समाचार