काठमाडौं। नेपाल टेलिकमले विभिन्न Value Added Service (VAS) प्रदायकमार्फत ग्राहकहरूलाई पठाइएका आपत्तिजनक SMS सन्देशबारे सचेत गर्दै कडा कारबाहीको चेतावनी दिएको छ।

टेलिकमले आज जारी गरेको विज्ञप्तिमा केही सेवा प्रदायकहरूले स्वीकृत सेवा सीमाभन्दा बाहिर गएर जातीय, धार्मिक, साम्प्रदायिक तथा राजनीतिक संवेदनशीलता भड्काउने खालका सन्देश पठाएको गुनासो आएको उल्लेख छ।

टेलिकमका अनुसार ग्राहकको व्यक्तिगत मोबाइल नम्बर तथा अन्य विवरण कुनै पनि सेवाप्रदायकलाई नबुझाइने बताउँदै यस्तो SMS प्रवाह रोक्न सबै VAS प्रदायकलाई निर्देशन दिइएको छ। “यस किसिमका गतिविधि दोहोरिए सम्झौताअनुसार सम्बन्ध विच्छेद हुन सक्छ,” विज्ञप्तिमा भनिएको छ।

ग्राहक गोपनीयताको सुरक्षालाई आफूले प्राथमिकतामा राख्ने उल्लेख गर्दै टेलिकमले राज्यका निकाय र सेवाग्राहीबाट प्राप्त सूचनाको आधारमा निगरानी कडा बनाइने जनाएको छ।