काठमाडौं, बैशाख ८ — नाडा अटोमोवाइल्स एसोसिएशन अफ नेपाल का प्रतिनिधिहरूले आज वाणिज्य, आपूर्ति तथा उपभोक्ता संरक्षण विभाग का महानिर्देशक रोशन ज्ञवालीसँग अटोमोबाइल वस्तुहरूमा अधिकतम खुद्रा मूल्य (MRP) सहितको स्टिकर अनिवार्य टाँस्ने विषयमा विस्तृत छलफल गरेका छन्।

विभागले चैत ३० गते जारी गरेको प्रेस विज्ञप्तिपछि उत्पन्न चासोका बीच भएको छलफलमा नाडाले उक्त व्यवस्थालाई उपभोक्ता हित र पारदर्शिताका लागि सकारात्मक कदम भन्दै स्वागत गरेको छ। साथै, सबै आयातित वस्तुमा अनिवार्य MRP उल्लेख गर्नुपर्ने र बिक्री गर्दा बिल जारी गर्नुपर्ने व्यवस्थालाई पनि नाडाले समर्थन जनाएको छ।

यद्यपि, नाडाले कार्यान्वयनका क्रममा देखिन सक्ने व्यवहारिक समस्या औंल्याउँदै पुरानो स्टकको व्यवस्थापन, भन्सार विन्दुमै स्टिकर टाँस्ने प्रक्रिया कत्तिको सम्भव हुने जस्ता विषयमा स्पष्टता माग गरेको छ। यसका लागि नाडाले विभागसमक्ष लिखित रूपमा सुझाव समेत पेश गरेको जनाएको छ।

छलफलका क्रममा महानिर्देशक ज्ञवालीले उपभोक्ता संरक्षण ऐनअनुसार नै यो व्यवस्था लागू गरिएको र सरकारको १०० बुँदे योजनामा पनि यसलाई प्राथमिकता दिइएको बताए। उनले कार्यान्वयनमा आउने समस्या समाधान गर्न विभाग तयार रहेको जनाउँदै व्यवसायीहरूको समेत प्रतिबद्धता आवश्यक रहेको उल्लेख गरे।

उनले उद्योगी र आयातकर्तालाई लक्षित गर्दै मूल्य सूचिसहितको स्टिकर टाँस्ने विषयमा विभाग कडाइका साथ अघि बढ्ने स्पष्ट पारे। साथै, आवश्यक परे कानुन सुधारका लागि नाडाबाट सुझाव आउनुपर्ने पनि उनले बताए।

उक्त भेटघाटमा नाडाका उपाध्यक्ष विक्रम सिंघानिया, महासचिव मिलनबाबु मल्ल लगायत पदाधिकारीहरूको सहभागिता रहेको थियो।