काठमाडौं । चीनमा जारी Beijing Auto Show मा BYD ले आफ्नो ओसियन सिरिज अन्तर्गत नयाँ फ्ल्यागशिप इलेक्ट्रिक एसयूभी ‘सिलायन ०८’ सार्वजनिक गरेको छ।

नयाँ सिलायन ०८ लाई ५ र ६ सिट विकल्पमा उपलब्ध गराइनेछ। यसमा कम्पनीको प्रिमियम क्रसओभर BYD Tang मा प्रयोग भएका अत्याधुनिक प्रविधि समावेश गरिएको छ। एसयूभीमा डुअल–चेम्बर एयर सस्पेन्सन र रियर–ह्वील स्टेयरिङ जस्ता सुविधाले ड्राइभिङ अनुभवलाई थप सहज र उन्नत बनाउने अपेक्षा गरिएको छ।

सिलायन ०८ मा दोस्रो जेनेरेशनको ब्लेड ब्याट्री जडान गरिएको छ, जसले फास्ट चार्जिङ सपोर्ट गर्छ। कम्पनीका अनुसार यो ब्याट्रीलाई करिब ९ मिनेटमै १० प्रतिशतबाट ९७ प्रतिशतसम्म चार्ज गर्न सकिन्छ, जुन यस वर्गका सवारी साधनमध्ये उल्लेखनीय विशेषता हो।

यसमा डुअल–मोटर अल–ह्वील ड्राइभ सिस्टम उपलब्ध गरिएको छ, जसले उच्च प्रदर्शन र सन्तुलित नियन्त्रण प्रदान गर्नेछ। यद्यपि ब्याट्री क्षमताबारे आधिकारिक विवरण सार्वजनिक गरिएको छैन, कम्पनीले एक पटकको पूर्ण चार्जमा करिब ९०० किलोमिटर (CLTC) रेन्ज दिने दाबी गरेको छ। केही अन्तर्राष्ट्रिय मिडिया रिपोर्टअनुसार यसमा १३०.५ किलोवाट–आवरको एलएफपी ब्याट्री प्रयोग हुनसक्ने अनुमान गरिएको छ।

नयाँ सिलायन ०८ यसै वर्षदेखि बजारमा ल्याइने तयारी गरिएको छ। यसको प्रारम्भिक मूल्य करिब ४४ हजार अमेरिकी डलर पर्ने अनुमान गरिएको छ, जसले यसलाई प्रिमियम इलेक्ट्रिक एसयूभी सेग्मेन्टमा प्रतिस्पर्धी विकल्प बनाउने देखिन्छ।