काठमाडौं । टोयोटा ले इन्डोनेसियामा ब्याट्री उत्पादन गर्न चीनको प्रमुख ब्याट्री निर्माता सीएटीएल सँग साझेदारी गर्ने भएको छ। उक्त ब्याट्रीहरू टोयोटाका हाइब्रिड तथा अन्य विद्युतीय सवारीसाधनहरूमा प्रयोग गरिने जनाइएको छ।

कम्पनीका अनुसार यो परियोजनाअन्तर्गत २०२६ को दोस्रो आधादेखि पूर्ण ब्याट्री प्याक तथा आवश्यक कम्पोनेन्टहरूको निर्यात समेत सुरु गर्ने योजना छ। दुवै कम्पनीले संयुक्त रूपमा करिब ७५.८ मिलियन अमेरिकी डलर लगानी गर्ने सहमति गरेका छन्।

सीएटीएलले सन् २०२५ देखि नै इन्डोनेसियामा ब्याट्री उत्पादन परियोजना अघि बढाइसकेको छ। उक्त परियोजनाबाट वार्षिक करिब १५ गिगावाट आवर (GWh) ब्याट्री उत्पादन गर्ने लक्ष्य राखिएको छ, जसले दक्षिणपूर्वी एसियामा विद्युतीय सवारी पूर्वाधार विस्तारमा महत्वपूर्ण भूमिका खेल्ने अपेक्षा गरिएको छ।

सीएटीएल विश्वकै सबैभन्दा ठूलो ईभी ब्याट्री निर्माता कम्पनी हो। चाइना अटोमोटिभ ब्याट्री इनोभेसन एलायन्सको तथ्याङ्क अनुसार चीनमा सन् २०२६ को पहिलो त्रैमासिकमा यसले करिब आधा बजार हिस्सा ओगटेको बताइएको छ।