विजयकुमार साह– जनकपुर
अवैध सम्बन्ध लुकाउन छिमेकीको हत्या गरेको आरोपमा प्रेमिपे्रमिकालाई महोत्तरी प्रहरीले पक्राउ गरेको छ ।
महोत्तरीको औरही नगरपालिका वडा नं. २ फुलबरीया बस्ने ४० वर्षीय बेचु महतोको हत्या आरोपमा सोही ठाउँ बस्ने ३० वर्षीय सुशिल सहनी र २९ वर्षीया जीतनी महतोलाई पक्राउ गरेका हुन् ।
गत बुधबार विवाहपञ्चमीको दिन बिहान गाउँभन्दा ५०० मिटर पूर्व उखुबारीमा मृत अवस्थामा बेचु महतोको शव फेला परेको थियो ।
इलाका प्रहरी कार्यालय गौशलाका इन्चार्ज इन्स्पेक्टर किशोर आचार्यले दिएको जानकारी अनुसार घटनाको अनुसन्धानको क्रममा पक्राउ परेका जीतनीले आफू र सुशिल सहनी मिलेर हत्या गरेको बयान दिएको छ ।
शुशिल सहनी र जीतनी बीच अनैतिक सम्बन्ध रहेको र उनीहरुको अवैद्य सम्बन्ध तथा क्रियाकलाप बेचुले देखेका थिए । गाउँमा आफ्नो पोल खुल्ने डरले खेतमा गएका बेचुलाई आफ्ना प्रेमी शुशिलसँग मिलेर हत्या गरेको बयान दिएकी छन् ।
जितनीको गर्भमा ७ महिनाको बच्चा समेत रहेको प्रहरीले जनाएको छ ।
जितनी देवी महतोको श्रीमान विजय महतो रोजगारीको शिलशिलामा काठमान्डौँ बस्दै आएका छन् भने जितनीको अनैतिक सम्बन्ध लामो समयदेखि सुशिलसँग रहेको र आफूहरुको अवैद्य क्रियाकलाप बारे श्रीमान तथा गाउँले बताइदिने डरले बेचुको ज्यान मार्ने योजना बनाएको बयानमा भनेकी छिन् ।
मंगलवार साँझ बेचु आफ्नो खेततर्फ जाँदै गरेको देखे पछि जितनी र शुशिलले उनलाई समातेर लहरीबोटले घाँटी च्याप्दै उँखुबारीमा लगेर हत्या गरेको स्वीकार गरेकी छन् । घटना स्थलमा भेटिएको मास्क र टोपीको आधारमा प्रहरीले अनुसन्धान गर्दै जाँदा सुशिलसम्म पुग्न सफल भएको प्रहरीले जनाएको छ ।
आरोपित शुशिल सहनी मँगलबार रातीदेखि नै घरबाट फरार भएपनि गएराती भारतीय प्रहरीले नेपाल भारत सीमाबाट समातेर जिल्ला प्रहरी कार्यालय महोत्तरीलाई जिम्मा लगाएको छ ।
गत मंगलबार राति आफ्नो काउली खेतमा निलगाई धपाउन गएका बेचू महतोको शव भोली पल्ट बुधवार विहान उखुबारीमा फेला परेको थियो । मृतकको घाँटीमा नीलडाम देखेपछि घाँटी थीचेर हत्या गरेको हुनसक्ने आंशकाको आधारमा अनुसन्धान थालेका थिए ।