बाँके : बाँके जिल्लाका मुस्लिम समुदायले शनिबार शान्ति र सद्भावको महान् पर्व ईदुल फितर मनाएका छन् ।
बिहानै नेपालगञ्जस्थित केन्द्रीय ईदगाहमा सामूहिक नमाजबाट सुरु भएको ईदको औपचारिक कार्यक्रमपछि जिल्लाका विभिन्न ठाउँमा अन्य विविध कार्यक्रमका साथ ईद पर्व मनाइएको छ ।

देशमा शान्ति र आर्थिक उन्नतिका लागि विशेष प्रार्थना गरिएको इदगाह सञ्चालक समितिका महासचिव ईर्फान सिद्धिकीले जानकारी दिए
उनले भने ‘रमजान र ईदलाई शान्तिपूर्ण तरिकाले सभ्य र भव्य रूपमा सम्पन्न गर्न सहयोग गर्ने सबैलाई आभार प्रकट समेत गर्छ । विहानको नमाजमा देशमा शान्ति, स्थिरता र समृद्धिको कामना गरियो । अब बिभिन्न कार्यक्रममा साथ तीन दिनसम्म इद मनाइने छ । ’
इदगाहमा नमाज सम्पन्न भएलगत्तै पूर्वमन्त्री मोहम्मद इश्तियाक राई, नेपालगञ्जका उपमेयर कमरुद्दीन राई, नेपाल उद्योग वाणिज्य महासंघा केन्द्रीय सदस्य अब्दुल मन्सुरी, वरिष्ठ अडिटर तथा समाजसेवी जुबेर राई र करिम खान लगायतले अधिकांशलाई अङ्कमाल गरेर ईदको शुभकामना प्रकट गरेका छन ।

त्यसै गरी अन्य धर्म सम्प्रदायका स्थानीय राजनीतिक दलका अगुवाहरू, प्रहरी प्रशासनका प्रमुखहरू, व्यवसायी तथा उद्योगीले ईदगाहमा पुगेर शुभकामना आदान प्रदान गरेका थिए । तीन दिनसम्म विभिन्न कार्यक्रम गरेर मनाइने यस पर्वमा मुसलमान समुदायले सेवई, जर्दा, विरयानी, कबाब लगायतका परिकार पकाएर आफन्त तथा ईष्टमित्रहरुलाई खुवाउने परम्परा रहेको छ । यसअघि शुक्रबार मात्र रमजानको अन्तिम शुक्रबारलाई सानो ईदको रूपमा मनाएर विभिन्न मस्जिदमा अलबिदाको सामूहिक नमाज पढेर ईदको स्वागतको तयारी गरिएको थियो ।