५ जेठ, काठमाडौँ- उद्योगमन्त्री नवीन्द्रराज जोशीले पेट्रोलियम पदार्थको अन्वेषण कार्यका लागि आगामी असार १५ गतेभित्र ग्लोबल टेन्डर आह्वान गरिसक्ने बताएका छन् ।

उद्योग मन्त्रालयद्वारा शुक्रबार यहाँ आयोजित पत्रकार सम्मेलनमा उनले पेट्रोलियम पदार्थ अन्वेषणका लागि धनगढीदेखि विराटनगरसम्म १० वटा ब्लकको पहिचान भएको बतए ।

ती सबै ब्लकमा पेट्रोलियम पदार्थ अन्वेषणका लागि ग्लोबल टेन्डर आह्वान गर्ने तयारी भइरहेको मन्त्री जोशीले बताए । उनले पैसावालाभन्दा पनि प्राविधिक रुपमा सक्षम निजी क्षेत्रलाई यो काम दिइने बताएका छन् ।

राष्ट्रको आर्थिक विकासमा खनिज क्षेत्रको महत्वपूर्ण योगदान हुने बताउँदै मन्त्री जोशीले रसुवाको जस्ता र सिसा खानी उद्योग सञ्चालनमा ल्याउने तयारी भइरहेको पनि जानकारी दिए ।

कुनै पनि उद्योगले विशेष औद्योगिक क्षेत्र स्थापना गर्न खोजेमा सरकारले उद्योगको प्रकृति, लगानी र रोजगारीको स्थिति हेरी लगानी गर्ने उनले बताए ।

छाला जुत्ताका व्यवसायीले उद्योग स्थापनाका लागि पहल गरिरहेको बताउँदै मन्त्री जोशीले उक्त क्षेत्रमा लगानी गर्न अर्थमन्त्रालयसँग छलफल भइरहेको समेत जानकारी दिए ।

नवलपरासीको धौवादी क्षेत्रमा रहेको फलामखानी उद्योग सञ्चालन गर्ने कार्य अगाडि बढाउने तयारी भइरहेको पनि मन्त्री जोशीले जानकारी दिए । उनले गणेश, हिमालजस्ता सिसा परियोजना उद्योग सञ्चालनमा ल्याउन छलफल भइरहेको पनि बताए ।