गण्डकी प्रदेशको राजधानी पोखरामा गुड्ने माइक्रोबसले एक वर्षमा १९ करोडभन्दा बढी रुपैयाँ बढी भाडा ठग्ने गरेका छन् ।

पोखरामा दैनिक चल्ने साढे तीन सय माइक्रोले प्रतियात्रु कम्तीमा ५ रुपैयाँका दरले बढी भाडा असुल गर्दै आएकाले वार्षिक झन्डै १९ करोड रुपैयाँभन्दा बढी भाडा असुल गरेको पाइएको हो ।

वि.सं. २०७२ मा भूकम्प जानुअघि १२ रुपैयाँमा यात्रा गर्न पाएका यात्रु भूकम्पका वेला बढेको भाडा तिर्न अहिले पनि बाध्य छन् । यसबीचमा दुईपटक भाडा समायोजन भएको छ । तर, पोखरामा त्यसको कुनै असर परेन ।

 

उपभोक्ता मञ्चका अध्यक्ष कपिलनाथ कोइरालाले नाकाबन्दीका वेला कालोबजारीमा महँगो तेल किन्नुपर्दा भाडा बढी लिनुपरेको भन्दै व्यवसायीले बढाएको भाडा त्यसपछि नघटेको बताए ।

 

कोइरालाका अनुसार पोखराका माइक्रोले प्रतियात्रु कम्तीमा पनि ५ रुपैयाँका दरले ठग्दै आएका छन् । यस हिसाबले सर्वसाधारणबाट वार्षिक झन्डै १९ करोड रुपैयाँभन्दा धेरै यहाँका माइक्रोले ठग्ने गरेका छन् ।

 

दैनिक ३६० माइक्रोबस

 

पोखरा बस व्यवसाय समितिका सचिव अमृत तिमिल्सिनाका अनुसार अहिले पोखरामा झन्डै चार सय माइक्रो छन् । त्यसमध्ये केही रिजर्भमा जाने र आलोपालोसमेत हुने हुँदा दैनिक ३६० माइक्रोले सेवा दिन्छन् । एउटा माइक्रोमा दिनमा तीन सय यात्रु चढ्दा ५ रुपैयाँको दरले १५ सय रुपैयाँ एउटै माइक्रोले यात्रुबाट बढी रकम असुल्छ । यस हिसाबले दिनमै ३६० माइक्रोले पाँच लाख ४० हजार ठग्छन् । एक महिनामा एक करोड ६२ लाख र वर्षमा १९ करोड ४४ लाख रुपैयाँ सर्वसाधारण यात्रुबाट माइक्रोले ठग्ने गरेका छन् ।

नयाँ भाडादरअनुसार महानगर क्षेत्रमा ४ किलोमिटरसम्म १४ रुपैयाँ, ५ किलोमिटरसम्म १६ रुपैयाँ, ६ किलोमिटरसम्म १७ रुपैयाँ, ८ किलोमिटरसम्म १८ रुपैयाँ, १९ किलोमिटरसम्म २६ रुपैयाँ र १९ किलोमिटरभन्दा माथि २७ रुपैयाँ निर्धारण भएको छ ।

 यसरी ठगिन्छन् यात्रु
माइक्रोबस चढेपछि १५ रुपैयाँ तिर्नुपर्छ । थप स्टेसन जाँदा एक रुपैयाँको दरले भाडा बढ्दै जानुपर्नेमा थप पाँच रुपैयाँ तिर्नुपर्छ । पछिल्लो समायोजन गरिएको भाडादरअनुसार सुरु स्टेसन ९४ किलोमिटरसम्म० को १४ रुपैयाँको सट्टा १५ तिर्नुपर्छ । यसअघि १२ तिरे हुनेमा पनि १५ रुपैयाँ नै तिर्नुपथ्र्यो । अर्को स्टेसन पुग्दा थप एक रुपैयाँ बढ्दा १५ तिर्नुपर्नेमा यात्रु २० तिर्न बाध्य छन् ।

ट्राफिक प्रहरी कार्यालय कास्कीका अनुसार पोखराको छोरेपाटनबाट लामाचौरसम्मको दूरी १४ किलोमिटर छ । सो दूरीमा यसअघि नै माइक्रोले ३० रुपैयाँ लिँदै आएका छन् । यातायात व्यवस्था कार्यालय गण्डकी ९सवारी०का प्रमुख अच्युत रेग्मीले सो दूरीको परिमार्जित भाडादरअनुरूप २४ रुपैयाँसम्म ठीक हुने बताए ।