काठमाडौं । राष्ट्रिय जनता पार्टी (राजपा)मा अध्यक्ष मण्डलका संयोजक राजेन्द्र महतो भएपछि पार्टीभित्र विवाद देखिएको छ ।
केहीकेहीले महतोलाई संयोजक दिनु हुँदैन भन्दै आएका थिए । विशेषगरी निवर्तमान संयोजक महन्थ ठाकुर पक्षधरका भने ठाकुरलाई संयोजक परिवर्तन गर्न चाहँदैनथे । २०७४ वैशाख ७ गते ६ वटा पार्टी मिलेर राजपा बनेको थियो । विधानमा दुई–दुई महिनामा नेतृत्व परिवर्तन गर्ने उल्लेख भएपनि ठाकुरले नछोडेपछि अनिल कुमार झा र राजकिशोर यादवको संयोजक बन्ने संभावना गुम्दै गएको छ ।
ठाकुरले १७ महिना संयोजक खाए । राजपाले आगामी वैशाख ७, ८ र ९ गते महाधिवेशन गर्ने जनाएको छ । त्यसो हुँदा अव महतोपछि महिन्द्र राय यादव र त्यसपछि शरतसिंह भण्डारी संयोजक बन्नेछन् । वैशाखमा अधिवेशन भए त्यतिबेला भण्डारी संयोजक रहनेछन् । महतो मंसीर ४ गते संयोजक भएका हुन् । अवको नयाँ नेतृत्वमा एकमात्र अध्यक्ष रहनेछन भने पदाधिकारी र केन्द्रीय समितिको विषयमा टुंगो लागिसकेको छैन । अहिले ८५१ जनाको केन्द्रीय कमिटी छ ।
अध्यक्ष मण्डलको संयोजक र सदस्यलाई बस्ने कुर्सी र कोठा भएपनि अरु पदाधिकारीहरुलाई भने राम्रो ढंगले बस्ने कुर्सी र कोठा समेत छैनन् । निर्वाचन अघि विभाजित उनीहरु एकता भएपछि भने ठुलो पार्टीमा परिणत भएका हुन् । थोरै सिट हाँसिल गरेपनि पद र प्रतिष्ठाका लागि भनेर विभाजन भइरहने उनीहरुबीच एकता भएपछि अहिले पार्टी ठुलो भएको छ । प्रतिनिधिसभामा राजपाले ११ सिट जितेको छ भने समानुपातिकतर्फ ६ सिट आएको छ । राजपाले राष्ट्रिय सभामा २ सिट जितेको छ ।
राजपाभित्र विवाद बढ्दै गएपछि समयमै महाधिवशेन हुँदैन कि भन्ने शंका पनि गरिएको छ । राजपा महासचिव केशव झाले जेजस्तो भएपनि समयमै अधिवेशन गर्नुपर्ने बताएका छन् । तर झाले अहिलेकै गतिविधि हेर्दा महाधिवेशन होला भन्नेमा विश्वास गर्न नसकिने बताए । २०७४ साल असार २३ गते निर्वाचन आयोगमा पार्टी दर्ताका लागि निवेदन दिएको राजपालाई आयोगले ३० गते पार्टीको मान्यता दिएको थियो । राजपाको अहिलेको विधानमा महाधिवेशन ३ महिनासम्म लम्ब्याउन सकिने जनाइएको छ । निर्वाचन आयोगलाई राजपाले असार ३० भित्रमा नयाँ नेतृत्वको नामावली बुझाउनु पर्नेहुन्छ । राजपाले सरकारलाई दिएको समर्थन फिर्ता गर्ने तयारी गरेको छ ।
आफूहरुका माग पूरा नभएको भन्दै राजपाले सरकारसँग असन्तुष्टि जनाउँदै आएको छ । २ नम्बर प्रदेशमा राजपा र संघीय समाजवादी फोरम नेपालको सरकार बनेको छ । त्यहाँ नेपाल कम्युनिष्ट पार्टीले पनि सरकारलाई समर्थन जनाएको छ । राजपाले केपी शर्मा ओली नेतृत्वको सरकारलाई दिएको समर्थन फिर्ता लिए र नेकपाले २ नम्बरमा समर्थन फिर्ता लिएपनि कुनै पनि सरकार संकटमा पर्दैनन् ।