रमेश कुमार बोहोरा
  प्रधानमन्त्री केपी शर्मा ओली नेतृत्वमा सरकार बनेको साढे नौ महिना भएको छ । यसबीचमा जनताले प्रत्यक्ष अनुभूति गर्नेगरी केही पाएनन् । त्यो त एउटा पाटो छँदैछ तर पनि जनताले स्वतन्त्रपूर्वक हिँड्डुल गर्न पाउने र बोल्न पाउने अधिकारमाथि नै बन्देज लगाउन खोजिएको छ । सरकारका पछिल्ला गतिविधि जनघाती हुँदै गएका छन् । जनताले बोलेका प्रत्येक शब्दमा सरकारले खबरदारी र निगरानी राख्दै आएको छ । आफू विरुद्ध बोल्नेलाई सरकारले जे पनि गर्ने भन्दै धम्क्याउन समेत थालेको छ ।
कञ्चनपुरकी १३ वर्षीय बालिका निर्मला पन्तको बलात्कारपछि हत्या भएको चार महिना बितिसक्दा पनि सरकारले अझैसम्म घटनाका दोषीलाई पत्ता लगाउन सकेको छैन । सर्वसाधारण जनताले यस विषयमा आवाज उठाइँरहदा सरकारले यस विषयमा नबोल्न र नलेख्न सरकारी सञ्चारमाध्यम गोरखापत्र, रेडियो नेपाल र नेपाल टेलिभिजनमा उर्दी नै जारी गरेको छ ।
यस विषयमा सरकार असफल भएको र धेरै आलोचना आउन थालेपछि सरकारले आफ्नो लाज ढाक्न यस्तो गरेको बताइएको छ । शुक्रबार ‘सरकार पाइयो, न्याय पाइएन’ भनेर पर्चा पम्प्लेट टाँस्ने केही व्यक्तिलाई प्रहरी प्रशासनले पक्राउ गरेको छ भने प्रहरीले बिजुलीको पोलमा टाँसिएको पर्चा च्यातिदिएको छ । सरकार यो घटनामा उदाशिन बन्दै गएको छ । जतिसुकै ठुला घटना भएपनि प्रहरी प्रशासनको सक्रियतामा तत्कालै दोषीलाई पक्राउ गरिएका धेरै उदाहरण छन् । तर यस विषयमा सरकारले देखाएको मौनता साँच्चै रहस्यात्मक छ । घटना के र कसरी भयो सरकारले अहिलेसम्म केही जवाफ दिन सकेको छैन । कसैको मानिस यो काण्डमा पर्छ कि भन्ने डरले उसलाई लुकाउन सरकार अनेक दाउमा छ । पछिल्लो समयमा सरकारप्रति जनताको गुनासो बढ्दै गएपछि सामाजिक सञ्जाल फेसबुक ट्वीटर र अन्य माध्यममा कडा निगरानी गरिएको छ । सरकार र मन्त्रीविरुद्ध कसैले लेखे उनीहरुलाई पक्राउ गर्ने काम ह्वात्तै बढेको छ । मंसीर ११ गते सरकारले सामाजिक सुरक्षाकोषको कार्यक्रमको विषयमा प्रचारबाजी गरियो । श्रम रोजगार तथा सामाजिक सुरक्षा मन्त्रालयको यो योजना जनतालाई जानकारी दिनु स्वभाविकै थियो । तर चलचित्रका नायक जस्तो प्रधानमन्त्री ओलीको तस्वीर नै बिजुलीको पोलमा टाँगेर प्रचार गर्नु अस्वभाविक भएको जनाइएको छ । सामाजिक सुरक्षा कोष सञ्चालनमा आएपछि मानिसहरुले धेरै राहत पाउँछन् र जीवन सुरक्षित भएको महशुस गर्छन भनिएपनि यसको प्रभावकारिता के रहन्छ र यो कसरी लागु हुन्छ भन्ने विषयमा सरकारले अहिलेसम्म बुझाउन सकेको छैन ।
मानिसकै जीवन तत्काल असुरक्षित भएपछि भोलिको दिनमा पाइने सेवा सुविधाको के अर्थ रहन्छ? भनेर धेरैले आलोचना समेत गरेका छन् । सरकार आफू असफल भएको छ । तर यसलाई ढाकछोप गर्न उ उल्टै जनतामाझ खनिएको छ । निर्वाचनका बेला गरेका प्रतिबद्धता पूरा नगरेर सरकारले जनमतको धज्जी उडाएको छ । दुई तिहाइको सरकार भनेपनि जनताले यसको अनुभूति गर्न पाइरहेका छैनन । सरकार अनावश्यक काममा सरकारी ढिकुटी खर्च गर्नमै व्यस्त छ भने उसले अघि सारेको सुखी नेपाली र समृद्धि नेपालको नारा समेत हावादारी बन्दै गएको छ ।