ओखलढुंगा फागुन २८। ओखलढुंगाको खिजिदेम्बा गाउँपालिका वडा नं. ४ स्थित कुण्डली माविका कर्मचारी सुजन सुनुवारमाथि प्रारम्भिक बालकक्षाका दुई बालकलाई खुट्टा ढोग्न र जुत्ता चाट्न लगाएको भन्ने आरोप लगाइएको छ ।

घटनाको सत्यतथ्य नबुझी विद्यालय व्यवस्थापन समितिका अध्यक्षले घटना तोडमोड गरेर मिडियालाई जानकारी गराई चरित्रहत्या हुने गरी समाचार सम्प्रेषण गराएका हुन् ।

कर्मचारी सुजन भन्छन्, ‘म घाम ताप्दै थिएँ । जोन दर्जीले बिस्कुट खाइरहेका थिए, नजिकै दुई बालक रिकेश दर्जी र आकाश दर्जी थिए । नजिकै बसेका सहपाठीले हेरिरहेका थिए । यत्तिकैमा मैले नमस्कार गर अनि उसले तिमीहरुलाई बिस्कुट दिन्छ भनिदिएँ ।’

घटनालाई बेलुका बालकका अभिभावकले जुत्ता चाट्न लगाएको आरोपसहित विद्यालय व्यवस्थापन समितिका अध्यक्षलाई जानकारी गराए । उक्त जानकारीपछि समितिका अध्यक्षले प्राधानाध्यापक, शिक्षक र कर्मचारीसँग कुनै पनि सोधपुछ नगरी सिधै समाचार सम्प्रेषणका लागि खबर गरेको कुरा कर्मचारी सुनुवारले बताए । स्मरणरहोस् विद्यालय व्यवस्थापन समितिका अध्यक्ष नै खिजिदेम्बा गाउँपालिका वडा नं। ४ का वडा अध्यक्ष हुन् । घटना सम्बन्धमा जानकारी लिन कहींकतैबाट आफूलाई सोधपुछ नभएको उनले बताए ।

विद्यालयका प्रधानाध्यापक नारायण दाहालका अनुसार सुजनले बिस्कुट खाने भए नमस्कार गर भन्दा रिकेश र आकाशले खुट्टा ढोगाएको कुरा घरमा भनेपछि सामान्य विषयलाई ठूलो बनाइएको बताए । आफूले बिहान अभिभावकहरुलाई विद्यालयमा बोलाएर छलफल गर्दा समाचारमा आएको जस्तो घटना नभएको कुरा पनि बताए ।