काठमाडौं । सञ्चार तथा सूचना प्रविधिमन्त्री रेखा शर्माले राज्यले नागरिकलाई उपलब्ध गराउने सेवाहरु सूचना प्रविधिमैत्री हुँदै गइरहेको बताएकी छिन् ।

छैठौं राष्ट्रिय सूचना तथा सञ्चार प्रविधि दिवसमा शुभकामना व्यक्त गर्दै उनले सञ्चार तथा सूचना प्रविधिले विश्वलाई एउटा गाउँका रूपमा परिणत गरेको बताइन् । मानव जीवनलाई सहज, सरल र समृद्ध बनाउन सुचना प्रविधिले महत्वपूर्ण भूमिका निर्वाह गरेको उनको भनाई छ ।

उनले भनिन्,‘सुचना प्रविधिको प्रयोगबाट आम नागरिकको जीवनमा गुणात्मक परिवर्तन आएको छ । सेवा प्रवाहमा पारदर्शिता, सहजता, छिटोछरितो हुनुको साथै लागत कटौतिमा मद्दत पुगेको छ । नागरिकले आर्थिक कारोवारसहित अत्यावश्यकीय सेवा, अनलाइनमार्फत् घरैबाटै पाउनसक्ने अवस्थाको सिर्जना भएको छ ।’

मन्त्री शर्माले प्रविधिको उपयोगलाई बढी विश्वसनीय, सुरक्षित र पहुँचयोग्य बनाएर आम नागरिकलाई विद्युतीय माध्यमबाट सरल, सहज, सुलभ तथा विश्वसनीयरूपमा सेवा उपलब्ध गराउन आवश्यकता रहेको धारण राखिन् ।

सञ्चार तथा सूचना प्रविधिको प्रयोग र विस्तारसँगै सुरक्षित प्रयोग गर्न नागरिक र सरकार सजग हुन आवश्यक भएको उनको भनाई छ । सूचना प्रविधिको प्रयोगबाट मुलुकले सुशासन र समृद्धि हासिल गर्नेमा सरकार विश्वास्थ रहेको उनले दाबी गरिन् ।

तीब्र विकास र उच्च आर्थिक वृद्धि गर्न समय सापेक्ष सूचना प्रविधिको उपयोग गरी सामाज रूपान्तरण गर्ने विश्वासका साथ डिजिटल नेपाल फ्रेमवर्क २०७६ कार्यान्वयनमा ल्याइएको उनको भनाई छ ।