काठमाडौं । प्रचण्ड सरकारका फूर्तिला मन्त्री सुदन किरातीले मन्त्रालय सम्हालेको बर्ष दिन पुग्यो। यो बिचमा उनले रहरलाग्दो र उदेकलाग्दो काम गरेको उनको विगतलाई कोट्याउदा थप प्रष्ट हुन्छ ।

जति चर्चा उति विवादमा पर्दै आएका उनले गरेका राजनीतिक नियुक्ति झन् विवादित बन्दै आएका छन् । पछिल्लो पटक उनको रोजाइमा परेका दुई महिलालाई अदालतले अयोग्य भनेपछि पर्यटन मन्त्री किरातीको योग्यतामा प्रश्न खडा भएको हो। लुम्बिनी विकास कोषमा अरवौ बजेट चलाउने पदमा नियुक्त गरिएकी गोरखाकी स्मिता भट्टलाई अदालतले अयोग्य ठहर गरिदियो। यता, पशुपति विकास कोषको कार्यकारी निर्देशकमा नियुक्ति पाएकी लक्ष्मी पुन पनि अदालतको नजरमा योग्य ठहरिनन् । सुदनले छानेका मान्छे माथी खोटै खोट लाग्दा पनि उनको स्वर मत्थर हुन सकेको छैन । सरकारै मै हुँ को अबस्थामा किराँती पुगेको उनको लवज बाटै प्रष्ट हुन्छ।

भोजपुरबाट चुनाव जितेका उनले भोजपुरेलाई मन्त्रालय जिम्मा लगाएका छन् । कर्मचारी प्रशासन हेर्ने सहसचिव हेमराज तामाङ भोजपुरकै हुन् । उनका सहोदर भाइ श्याम तामाङले मन्त्रीको निजि सचिवालयको तालाचाबी बोकेका छन् । उक्त मन्त्रालयमा बहुमत कर्मचारी भोजपुरमै जन्मिएका मात्र छन् । भोजपुर ससुराली भएका सचिवलाई सरुवा गराएर ल्याउन खोजेपनी त्यो चाहिँ पार लगाउन नसकेको चर्चा कर्मचारी बृत्तमा हुन थालेको छ।