पोखरा, २०८१ पौष २० – नेपाल अटोमोबाइल डिलर्स एसोसिएशन (नाडा) ले पोखरामा पहिलो पटक “नाडा प्रिजेण्ट्स् वाडा अटो शो २०२५” को आयोजना गर्न लागेको छ। यो आयोजना २०८१ चैत्र १४ देखि १७ सम्म पोखराको प्रदर्शनी केन्द्रमा हुनेछ। यसका लागि आजदेखि बुकिङ्ग खुल्ला गरिएको छ।

नाडाले यसअघि २०८१ पौष २० गते काठमाडौंमा आफ्नो संस्थागत सदस्य पश्चिमाञ्चल अटोमोवाइल डिलर्स एसोसिएशन (वाडा) का पदाधिकारी तथा सदस्यहरू बीच पोखरामा पहिलो पटक वाडा अटो शो आयोजना गर्ने सम्बन्धमा अन्तरक्रिया कार्यक्रमको आयोजना गरेको थियो। प्रदर्शनीमा भाग लिने सम्बन्धी गरिएको सर्वेक्षणको आधारमा यस वर्ष पहिलो पटक पोखरामा वाडा अटो शो आयोजना गर्न लागिएको छ।

नाडा प्रिजेण्ट्स् वाडा अटो शोमा २–पाङग्रे, ३–पाङग्रे, ४–पाङग्रे, लाइट कमर्शियल, हेभि कमर्शियल तथा मेसिनरी इक्युप्मेन्ट्स्, वित्तिय संस्था, इन्स्योरेन्स, अटो कम्पोनेन्ट्स् एवं ग्यारेज उपकरणहरुलाई समुह अनुसार छुट्टाइएको हुँदा सोही अनुरुप रजिष्ट्रेशन गर्न मिल्ने व्यवस्था मिलाइएको छ।

वाडाका अध्यक्ष दिपेन्द्र कोइरालाका अनुसार, “अर्थतन्त्रमा राजस्व संकलन र रोजगारी सृजनाका लागि विशेष योगदान पु¥याउदै आईरहेको सवारी साधन क्षेत्रमा संलग्न उद्योगी, व्यवसायी, कर्मचारी एवं आम उपभोक्ताहरूलाई यस नाडा प्रिजेण्ट्स वाडा अटो शो २०२५ ले सकारात्मक उर्जा एवं नविनतम् प्रविधिहरुको साक्षात्कार गराउने अपेक्षा राखिएको छ।”

नाडाले यसै क्रममा सम्भाव्यता अध्ययन गरी आफ्ना प्रदेश एसोसिएशनहरु मार्फत नेपालका अन्य मुख्य सहरहरुमा अटो प्रदर्शनीको आयोजना गर्ने योजना बनाएको छ।