काठमाडौं । सिद्धार्थ बैंक लिमिटेडले ‘ग्लोबल मनी विक २०२६’ को अवसरमा देशव्यापी रूपमा विभिन्न कार्यक्रम सञ्चालन गरी २,६४९ जना विद्यार्थीलाई वित्तीय शिक्षा प्रदान गरेको जनाएको छ।

मार्च १६ देखि २२ सम्म मनाइएको उक्त सप्ताहअन्तर्गत बैंकले सातै प्रदेशका ३८ स्थानमा वित्तीय साक्षरता कार्यक्रम आयोजना गरेको थियो। कार्यक्रममा २,१७१ जना विद्यार्थी सहभागी भएका थिए।

बैंकका अनुसार कार्यक्रममा बैंकिङ सेवा, डिजिटल कारोबार र त्यसमा अपनाउनुपर्ने सावधानीबारे जानकारी दिँदै विद्यार्थीहरूमा वित्तीय ज्ञान र व्यवहारिक सीप अभिवृद्धि गर्ने लक्ष्य राखिएको थियो।

त्यसैगरी, ४७८ जना विद्यार्थीलाई बैंकका विभिन्न शाखामा भ्रमण गराई बैंकिङ प्रणालीबारे व्यवहारिक अनुभव प्रदान गरिएको थियो।

बैंकले वित्तीय पहुँच विस्तार र जनचेतना अभिवृद्धि गर्ने उद्देश्यले सप्ताहभर सामाजिक सञ्जालमार्फत जानकारीमूलक सामग्री पनि प्रकाशन गरेको जनाएको छ।