इलाम, कोशी प्रदेश — पाकिस्तान दूतावास काठमाडौंले नेपाल–पाकिस्तान युवा परिषद्‌ (NPYC) सँगको सहकार्यमा इलाम जिल्लाका बाढीपीडित परिवारहरूलाई राहत सामग्री वितरण गरेको छ।

सन् 2025 अक्टोबर 17 मा माङसेबुङ र फाकफोकथुम गाउँपालिकाका प्रभावित परिवारहरूलाई गजुरमुखी धाममा आयोजित कार्यक्रममा राहत वितरण गरिएको हो।

कार्यक्रममा पाकिस्तानका राजदूत महामहिम अबरार एच. हाश्मी, दूतावासका प्रथम सचिव मुहम्मद हारुन रसीद र NPYC का संयोजक ऋचुमणी लुइटेल सहभागी थिए। सो अवसरमा प्रमुख जिल्ला अधिकारी सुनीता नेपाल, जिल्ला प्रहरी प्रमुख एसपी एक नारायण कोइराला, गाउँपालिका अध्यक्ष तथा स्थानीयवासीहरूको उपस्थिति थियो।

राजदूत हाश्मीले बाढीपीडितप्रति समवेदना र ऐक्यबद्धता प्रकट गर्दै पाकिस्तानका जनताबाट प्रेमको प्रतीकस्वरूप राहत सामग्री हस्तान्तरण गरे। उनले नेपाल र पाकिस्तानबीचको मैत्री र सहयोगका सम्बन्ध अझ प्रगाढ बनाउने प्रतिबद्धता जनाए।

उक्त अवसरमा राजदूतले विशेष घोषणा गर्दै इलामका बाढीपीडित विद्यार्थीहरूका लागि चारवटा छात्रवृत्ति (MBBS, BDS र B. Pharmacy कार्यक्रमहरू अन्तर्गत) तथा माध्यमिक तहका ५० छात्रवृत्ति प्रदान गर्ने घोषणा गरे।

यसअघि, राजदूत हाश्मीले विराटनगरमा कोशी प्रदेशका आन्तरिक मामिला तथा कानुन मन्त्री माननीय रिवती भण्डारीसँग भेट गरी हालैका बाढीपीडितहरू प्रति समवेदना व्यक्त गरे र आफ्नो एकजुटता भ्रमणको उद्देश्य जानकारी गराए।