धरान, जेठ १२। जीवन विकास लघुवित्तको सेवा केन्द्र धरानका कर्मचारी शम्भु गच्छदारले आफूलाई दिन दहाडै गोली हानी तीन लाख रुपैयाँ लुटिएको दाबी गरेका छन् ।

सुनसरी जिल्लाको धरान–५ साउनेमा लघुवित्तको पैसा लैजाँदै गर्दा नचिनेका मानिसले गोली हानी पैसा लुटेको गच्छदारले जानकारी गराएको सुनसरीका प्रहरी उपरीक्षक राजन अधिकारीले बताएका छन् ।

गच्छदारको कुहिनो र कम्मरमा चोट लागेको भए पनि गोली हानिएको र रकम लुटिएकोबारे अहिल्यै भन्न नसकिने अधिकारीले बताएका छन् । प्रहरी उपरीक्षक अधिकारीसहितको प्रहरी टोली घटनास्थलतर्फ गइसकेको छ ।

घटनाबारे अनुसन्धान र छानविनपछि मात्र सबै कुरा भन्न सकिने उनले बताएका छन् ।